VIDEO/ E pazakontë! Rrufeja godet raketën kineze 30 sekonda pas lëshimit, misioni vazhdon me sukses
Një moment spektakolar është regjistruar në Kinë, ku një raketë Long March 3B u godit nga një rrufe vetëm 30 sekonda pas lëshimit. Ngjarja u filmua nga spektatorët që po ndiqnin nisjen.
Raketa u ngrit më 23 korrik nga Qendra e Lëshimit të Satelitëve Xichang, duke transportuar një satelit komunikimi drejt orbitës gjeostacionare. Pamjet tregojnë momentin kur rrufeja godet raketën në fluturim, duke shkaktuar britma habie nga turma e mbledhur pranë vendit të lëshimit.
Pavarsisht goditjes, misioni përfundoi me sukses. Sipas Korporatës Kineze të Shkencës dhe Teknologjisë Hapësinore (CASC), raketa e vendosi satelitin në orbitën e planifikuar. Sateliti do të përdoret për komunikimet me stacionin hapësinor kinez Tiangong dhe misione të tjera me astronautë.
Nuk është hera e parë që një raketë goditet nga rrufeja menjëherë pas ngritjes. Në vitin 1969, raketa Saturn V e misionit Apollo 12 të NASA-s u godit dy herë nga rrufeja gjatë fluturimit. Edhe pse disa instrumente pësuan dëmtime, misioni vazhdoi dhe astronautët arritën të zbarkonin në Hënë sipas planit.
Një rast i ngjashëm ndodhi edhe në vitin 2019, kur një raketë ruse Soyuz u godit nga rrufeja pak pas lëshimit, por arriti ta vendoste me sukses satelitin e komunikimit në orbitë.
Megjithatë, jo çdo incident ka përfunduar pa pasoja. Në vitin 1987, një raketë Atlas/Centaur-67 u godit nga rrufeja, çka shkaktoi mosfunksionimin e kompjuterit të drejtimit dhe përfundoi me shpërbërjen e raketës gjatë fluturimit. Pas atij aksidenti, NASA zhvilloi Kriteret e Kontrollit të Nisjeve në Kushte Rrufesh (LLCC), një sërë rregullash të rrepta meteorologjike që përdoren edhe sot për të minimizuar rrezikun e goditjeve nga rrufetë gjatë lëshimit të raketave.