Rivlerësimi i pasurive të paluajtshme, ministri Malaj: Buxheti ka përfituar 50 milionë euro deri më tani
Ministri i Financave, Petrit Malaj, ka njoftuar se nga procesi i rivlerësimit të pasurive të paluajtshme janë arkëtuar deri tani rreth 50 milionë euro në buxhetin e shtetit.
Malaj theksoi se kjo shumë është pothuajse e njëjtë me të ardhurat e siguruara nga procesi i fundit i rivlerësimit, i cili u zhvillua në vitin 2022. Ai shtoi se pritet që ky përfitim të rritet më tej deri në mbylljen e afatit, më 31 dhjetor 2026.
“Të ardhurat e gjeneruara nga fillimi i procesit të rivlerësimit, në shkurt të vitit 2026, kanë arritur në 5 miliardë lekë (50 milionë euro). Kjo shumë e arkëtuar deri më tani është pothuajse e njëjtë me atë të procesit të fundit të rivlerësimit. Në vitin 2022, të ardhurat e arkëtuara arritën në 5.6 miliardë lekë. Deri në përfundim të procesit, më 31 dhjetor 2026, të ardhurat nga ky proces pritet të jenë edhe më të larta”, tha Malaj.