Shpërthim në Moskë: Tre persona të vdekur, autoritetet dyshojnë për bombul gazi
Tre persona humbën jetën dhe 15 të tjerë u plagosën pas një shpërthimi që ndodhi të shtunën në mbrëmje pranë një kafeneje në qendër të Moskës.
Shpërthimi raportohet të ketë ndodhur rreth orës 20:00 me kohën lokale, pranë një kafeneje verore e cila ndodhet në ose pranë njërit prej shtatë rrokaqiejve të epokës së Stalinit në Sheshin Kudrinskaya, sipas një deklarate të policisë. Të plagosurit kanë pësuar lëndime të shkallëve të ndryshme të rëndësisë, u shtua në deklaratë.
Hetuesit dhe ekipet e emergjencës po vijojnë punën në vendngjarje, thuhet në njoftimin e policisë. Televizioni shtetëror rus raportoi se shpërthimi mund të jetë shkaktuar nga një bombul gazi.
Agjencia shtetërore ruse e lajmeve RIA publikoi pamje filmike të policisë së armatosur rëndë në vendin e ngjarjes, i cili ishte bllokuar për publikun. Të dhënat nga mediat ruse tregojnë se trafiku pranë sheshit është ndërprerë përkohësisht.
Një media online me lidhje të forta me policinë, e quajtur “Baza”, raportoi se shpërthimi ndodhi në restorantin italian luksoz Balzi Rossi. Sipas faqes zyrtare të restorantit, ky i fundit kishte qenë i mbyllur të shtunën për një aktivitet privat.