Katër zona të reja në Shkodër përfshihen në Paketën e Maleve, emrat e fshatrave
Këshilli i Ministrave ka miratuar zgjerimin e hartës së territoreve të përfshira në Paketën e Maleve në Bashkinë Shkodër, duke shtuar katër zona të reja me një sipërfaqe totale prej rreth 23 hektarësh. Ky vendim synon të nxisë zhvillimin e ekonomisë malore dhe të krijojë mundësi të reja për investime në zonat rurale dhe malore.
Propozimi për këtë vendim është bërë nga Ministri i Shtetit për Pushtetin Vendor dhe është nënshkruar nga zëvendëskryeministrja Albana Koçiu. Territoret e reja të përfshira ndodhen në njësitë administrative Shalë, Shosh, Pult dhe Postribë të Bashkisë Shkodër.
Për zbatimin e këtij vendimi dhe për zhvillimin e këtyre zonave janë ngarkuar Ministria e Ekonomisë dhe Inovacionit, Agjencia Shtetërore e Kadastrës dhe Bashkia Shkodër.
Sipas vendimit, zonat e reja të përfshira në Paketën e Maleve janë:
- Zona Nr. 6 – Njësia Administrative Shalë: Përfshin fshatrat Nderlysaj, Lekaj, Gimaj, Nënmavriq, Nicaj-Shalë, Abat, Pecaj, Vuksanaj dhe Lotaj, me një sipërfaqe prej 4,667 hektarësh.
- Zona Nr. 7 – Njësia Administrative Shosh: Përfshin fshatrat Ndrejaj, Nikaj-Shosh, Palaj, Pepsumaj dhe Brashtë, me një sipërfaqe prej 4,458 hektarësh.
- Zona Nr. 8 – Njësia Administrative Pult: Përfshin fshatrat Pog, Kir, Gjuraj, Plan, Xhan, Bruçaj dhe Mgull, duke qenë zona me sipërfaqen më të madhe të përfshirë, me 11,080 hektarë.
- Zona Nr. 9 – Njësia Administrative Postribë: Përfshin fshatrat Drisht, Ura e Shtrenjtë, Domen dhe Prekal, me një sipërfaqe prej 3,183 hektarësh.