“`html
SHBA ‘përçau’ opozitën: Kush janë deputetët që nuk dhanë firmën për ankimimin në Kushtetuese, Bardhi mbajti sekret emrat
Marrëveshja për kredinë prej 302 milionë dollarësh me Shtetet e Bashkuara, e cila u miratua në Kuvend me procedurë të përshpejtuar vetëm me votat e socialistëve, ka sjellë përçarje brenda grupit parlamentar të Partisë Demokratike.
Përtej vendimit të përbashkët për të mos qenë të pranishëm gjatë votimit në Kuvend, një pjesë e deputetëve kanë qenë kundër dërgimit të kësaj marrëveshjeje në Gjykatën Kushtetuese.
Njoftimi për ankimimin u bë nga kreu i grupit parlamentar të PD-së, Gazment Bardhi, i cili deklaroi se kërkesa mbante firmën e 27 deputetëve. Një pjesë e tyre, mësohet nga burime për SHEKULLI, kanë kërkuar që emrat e tyre të mos bëhen publikë, duke marrë parasysh marrëdhënien strategjike që Shqipëria ka me SHBA-të. Kjo marrëveshje u përshëndet edhe nga Departamenti Amerikan i Shtetit dhe ambasada në Tiranë.
PD pretendon se nuk është kundër marrëveshjes së finalizuar me amerikanët në fushën e mbrojtjes ushtarake, por është kundër procedurës që u ndoq për miratimin e saj.
Në mesin e deputetëve që nuk kanë pranuar të firmosin ankimimin përmenden emrat e mëposhtëm:
- Jorida Tabaku
- Luçiano Boçi
- Fatmir Mediu
- Bujar Leskaj
- Oerd Bylykbashi
- Jozefina Topalli
- Luan Baçi
- Besart Xhaferri
Një pjesë e konsiderueshme e deputetëve të PD-së e kanë konsideruar një lëvizje politike të gabuar dërgimin e marrëveshjes në Gjykatën Kushtetuese, ndërsa ndikimi i SHBA-ve vërehet në të gjitha drejtimet e politikës shqiptare.
Teksa njoftoi ankimimin, kryetari i grupit të PD-së, Gazment Bardhi, theksoi se Partia Demokratike kishte paralajmëruar gjatë seancës plenare se procedura e përshpejtuar e ndjekur nga shumica binte në kundërshtim me Kushtetutën. Ai shtoi se shqetësimi i opozitës nuk lidhet me përmbajtjen e marrëveshjes, por me mënyrën e miratimit të saj.
Sipas Bardhit, çështja nuk përbën një debat politik, por një konflikt kushtetues që prek funksionimin e institucioneve demokratike dhe shtetin e së drejtës. Ai theksoi se Partia Demokratike e mbështet në parim marrëveshjen, duke e konsideruar atë me rëndësi strategjike për modernizimin e Forcave të Armatosura dhe përmbushjen e angazhimeve të Shqipërisë në NATO. Megjithatë, argumentoi ai, një marrëveshje e tillë duhej të miratohej duke respektuar plotësisht Kushtetutën, transparencën dhe procedurat parlamentare.
“`