“`html
Tenderat, 20 milionë euro për ujësjellës dhe impiante në Dhërmi, Qeparo dhe Pustec
Dhërmi. Çati me tjegulla, fasada të bardha dhe dendësi e moderuar: këto janë elemente bazë për standarde zonale.
Janë hapur tre tendera me një vlerë të përbashkët prej rreth 20 milionë euro për investime në sistemet e ujësjellësit, kanalizimeve dhe impianteve të trajtimit të ujërave të ndotura në Dhërmi, Qeparo dhe Pustec. Pjesa më e madhe e fondit është parashikuar për Dhërmiun.
Në total, fondi limit për këto tre procedura arrin në rreth 1.82 miliardë lekë, që konvertohen në afërsisht 20 milionë euro.
- Projekti në Dhërmi ka një fond limit prej 1.129 miliardë lekësh.
- Projekti në Pustec ka një fond limit prej 522.85 milionë lekësh.
- Për ujësjellësin e Qeparoit janë parashikuar 166.67 milionë lekë.
Dhërmi: Investim në trajtimin e ujërave të ndotura dhe kanalizime
Shoqëria Rajonale Ujësjellës Kanalizime Vlorë ka shpallur tenderin për ndërtimin e impiantit të trajtimit të ujërave të ndotura dhe sistemit të kanalizimeve në Dhërmi. Ky projekt, pjesë e Programit Buxhetor Afatmesëm 2024-2026, synon të zgjerojë rrjetin ekzistues, të rrisë zonën e mbuluar nga shërbimi dhe të sigurojë trajtimin e ujërave të ndotura para se ato të shkarkohen në det, larg bregut.
Ndërhyrja do të përfshijë fshatin e vjetër të Dhërmiut dhe zonën turistike në pjesën lindore. Sistemi është projektuar për mbledhjen, transferimin dhe trajtimin e ujërave të ndotura. Gjithashtu, parashikohet lidhja e familjeve me rrjetin qendror, duke zëvendësuar kështu përdorimin e gropave septike.
Pustec: Përmirësimi i infrastrukturës së kanalizimeve
Në Pustec, Shoqëria Rajonale Ujësjellës Kanalizime Korçë ka hapur tenderin me fond limit 522.85 milionë lekë për ndërtimin e rrjetit të kanalizimeve dhe impianteve të trajtimit të ujërave të ndotura në fshatrat e bashkisë. Projekti është hartuar për një zonë me rreth 5,191 banorë dhe ka për qëllim adresimin e mungesës së infrastrukturës bashkëkohore të kanalizimeve dhe zgjidhjen e problemit të shkarkimeve nga banesat.
Relacioni teknik thekson gjendjen e amortizuar të rrjeteve ekzistuese dhe mungesën e tyre në disa zona. Dokumenti përmend gjithashtu probleme me daljen e ujërave në sipërfaqe, shqetësime higjienike dhe përmbytje nga reshjet. Rrjeti kryesor do të funksionojë me vetërrjedhje. Për zonat pranë liqenit, do të sigurohet trajtimi i ujërave të ndotura para shkarkimit, për të shmangur ndikimin negativ në ekosistemin e liqenit.
Qeparo: Investim në ujësjellës
Tenderi i tretë është shpallur nga Bashkia Himarë për ndërtimin e ujësjellësit të Qeparoit, me fond limit 166.67 milionë lekë. Projekti do të mbulojë Qeparo Fshat dhe Qeparo Fushë dhe është hartuar për një popullsi totale prej 2,769 banorësh.
Sistemi do të furnizohet nga burimet e Borshit. Linja kryesore e transmetimit do të kalojë drejt zonës së projektit, ndërsa një stacion pompimi do të dërgojë ujin në një rezervuar ekzistues me kapacitet 200 metra kub. Studimi hidrogjeologjik përfshirë në dokumentacion ka llogaritur një prurje të disponueshme prej 22 litrash në sekondë nga burimi i Borshit për furnizimin e Qeparoit.
“`