“`html
Berisha kundër shtetit Bektashi: Shqipëria është shtet laik!
Kreu i Partisë Demokratike, Sali Berisha, është shprehur kundër krijimit të një shteti bektashi në Shqipëri. Ai e cilësoi këtë nismë, të propozuar nga kryeministri Edi Rama, si “antikushtetuese” dhe “antikombëtare”.
Në një deklaratë për mediat, Berisha theksoi se Partia Demokratike ka kundërshtuar këtë projekt që prej vitit 2024. Sipas tij, krijimi i një shteti bektashi bie në kundërshtim me Kushtetutën dhe karakterin laik të Shqipërisë.
Berisha shprehu shqetësimin se një iniciativë e tillë mund të nxisë përçarje fetare në vend.
“Partia Demokratike ka reaguar fuqishëm. Cilido që është i interesuar për reagimet e PD-së, i sugjeroj t’u referohet deklaratave të mia. Kam qenë në arrest shtëpie kur unë kam ngritur zërin kundër tij dhe duhet të ketë qenë janari i vitit 2024,” tha Berisha.
Ai shtoi se ky veprim është në radhë të parë kundër bektashizmit shqiptar, të cilin e cilësoi si “një shtyllë të vërtetë të atdhetarisë”.
“Kjo aventurë, siç kemi deklaruar më parë, vjen në kundërshtim të hapur me Kushtetutën e Shqipërisë dhe me karakterin laik të shtetit shqiptar që nga themelimi i tij gjer sot. Përpiqet të nxisë përçarje fetare në një vend ku toleranca dhe bashkëpunimi fetar është gjëja më madhështore në shpirtin e atij populli,” përfundoi Berisha.
“`