“`html
Rama pas takimit 6-orësh me drejtuesit politikë të PS-së: Përgatitjet për sezonin e ri politik, fokus te “Besa” dhe “Pasqyra”
Nga Shek, POGRADEC – Pas një takimi 6-orësh me drejtuesit politikë të qarqeve të Partisë Socialiste, kryeministri dhe njëherësh kreu i PS-së, Edi Rama, ka ndarë një video nga Pogradeci, duke bërë një përmbledhje të diskutimeve të zhvilluara gjatë mbledhjes.
Rama theksoi se takimi ishte pjesë e përgatitjeve për sezonin e ri politik. Në fokus të diskutimeve ishin konceptet si “Besa”, “Prania Besnike” dhe një ekosistem i ri komunikimi mes qeverisë dhe qytetarëve.
Një element kyç i diskutimeve, sipas kryeministrit, ishte platforma “Pasqyrë Albania”. Kjo platformë synon të ofrojë një pikë unike qasjeje për qytetarët drejt institucioneve, duke u mundësuar atyre të ndjekin në kohë reale problematikat apo kërkesat e tyre.
Duke e krahasuar këtë proces me një pako postare, Rama shpjegoi se statusi i çdo kërkese do të jetë i monitorueshëm nga dërguesi në çdo moment. “Ambicia është që, më herët se vonë, të arrijmë pikën që çdo kërkesë, çdo shqetësim, çdo hall i qytetarit drejtuar institucioneve të jetë si një pako postale, statusi i së cilës ndiqet në kohë reale nga dërguesi”, deklaroi Rama.
Sipas tij, ky sistem do të mundësojë edhe institucionet të ndjekin përgjegjësitë e tyre, ndërsa çdo shkelje e afateve do të bëhet e dukshme. “Nga ana tjetër, shteti, qeveria, institucionet ndjekin përgjegjësitë dhe çdo shkelje afati shihet me lupë”, shtoi kryeministri.
Në vijim të postimit, Rama shtoi:
- “Nga Pogradeci, kur dielli po perëndon mbi liqen, aty ku Lasgushi gjente frymëzimet e veta magjepsëse dhe aty ku ne u përpoqëm të mbledhim së bashku reflektimet e një periudhe pushimesh aktive, të lidhur me sezonin e ri politik, kemi diskutuar për “Besën”, kemi diskutuar për praninë besnike; kemi diskutuar për ekosistemin e ri të komunikimit të qeverisë, jo në kuptimin thjesht të komunikimit publik, por të komunikimit me qytetarin; kemi diskutuar edhe për pasqyrën unike, “Pasqyrë Albania”, ku qytetarët do të kenë të pranishme të gjitha institucionet dhe ku ambicia është që, më herët se vonë, të arrijmë pikën që çdo kërkesë, çdo shqetësim, çdo hall i qytetarit drejtuar institucioneve të jetë si një pako postale, statusi i së cilës ndiqet në kohë reale nga dërguesi dhe, nga ana tjetër, shteti, qeveria, institucionet ndjekin përgjegjësitë dhe çdo shkelje afati shihet me lupë.”
Në ditën në vijim, Rama do të mbledhë ministrat në Pogradec për të bërë bilancin e punës së dikastereve dhe për të përcaktuar prioritetet për vitin e dytë të mandatit të katërt.
“`