VIDEO/ Pas më shumë se 6 orësh pritje, gjyshi nga Pogradeci takon Ramën: Do të thonë që je patronazhist (Premtimi për rrugën)
Publikuar më 23.08.2026 nga Shek
Dëshira e 78-vjeçarit Çelnik Shtupalli nga fshati Homçan i Pogradecit për të takuar kryeministrin Edi Rama u realizua.
I moshuari priti jashtë rezidencës qeveritare në Pogradec, me shpresën për të takuar Ramën dhe kryebashkiakun Ilir Xhakolli, të cilëve dëshironte t’u falënderonte për zgjidhjen e disa problemeve që kishte ngritur.
Pas përfundimit të mbledhjes me drejtuesit politikë të Partisë Socialiste në qarqe, Rama pa intervistën e 78-vjeçarit dhe kërkoi ta takonte.
Takimi i shkurtër u zhvillua në Tushemisht. Shtupalli i parashtroi kryeministrit edhe një kërkesë të re: asfaltimin e rrugës së fshatit Homçan, në zonën e Mokrës. Rruga është rreth 4 kilometra e gjatë dhe sipas banorit, përbën një nga problematikat kryesore për komunitetin e zonës.
Në takim ishte i pranishëm edhe kryetari i Bashkisë Pogradec, Ilir Xhakolli.
Rama e pyeti për kërkesën e banorit, ndërsa Xhakolli u shpreh se rruga do të realizohet përpara përfundimit të mandatit.
I moshuari e komplimentoi Ramën, ndërsa kryeministri u shpreh me humor se do ta quajnë patronazhist.