Ulje e ndjeshme e çmimeve për amerikanët, Trump përshëndet marrëveshjen: 100 miliardë dollarë investime private për Venezuelën
Shtetet e Bashkuara kanë arritur një marrëveshje me Venezuelën për të menaxhuar më shumë se 65 miliardë fuçi rezerva të provuara nafte, njoftoi presidenti amerikan Donald Trump. Sipas tij, ky transaksion historik më shumë se dyfishon rezervat amerikane të naftës, rrit ndjeshëm furnizimin dhe do të ulë dukshëm çmimet e benzinës për të gjithë amerikanët.
Marrëveshja u përshëndet edhe nga presidentja e përkohshme e Venezuelës, Delcy Rodriguez, e cila e cilësoi atë si një hap të rëndësishëm për rimëkëmbjen ekonomike të vendit. Trump është shprehur se do të shfrytëzojë rezervat e Venezuelës, të cilat konsiderohen më të mëdhatë në botë, duke pasur parasysh veprimet e Shteteve të Bashkuara ndaj presidentit të atëhershëm Nicolás Maduro gjatë vitit.
Administrata amerikane është përballur kohët e fundit edhe me presion për uljen e çmimeve të benzinës në vend, të cilat janë rritur ndjeshëm si pasojë e konfliktit me Iranin. Sekretari amerikan i Shtetit, Marco Rubio, e cilësoi marrëveshjen si “një fitore të madhe si për popullin amerikan, ashtu edhe për atë venezuelian”.
Edhe pse detaje specifike të saj nuk janë bërë ende publike, sipas Rubio, marrëveshja pritet të sjellë rreth 100 miliardë dollarë investime private në Venezuelë, të mbështesë mijëra vende pune me paga të larta dhe të kontribuojë në rindërtimin e ekonomisë së vendit.
Trump deklaroi se Rubio dhe Sekretari i Mbrojtjes, Pete Hegseth, e kanë finalizuar marrëveshjen me autoritetet venezueliane “përmes një partneriteti me biznesin privat”. Ai nuk dha detaje mbi kompanitë e përfshira, kushtet e saj apo detyrimet e palëve, por theksoi se ajo është arritur “pa asnjë kosto për taksapaguesit amerikanë”.
17 fusha nafte dhe koncesion 100-vjeçar
Sipas Delcy Rodriguez, marrëveshja parashikon zhvillimin e 17 fushave strategjike të naftës, me rezerva të provuara prej rreth 65 miliardë fuçish. Ajo shtoi se projekti do të shoqërohet me më shumë se 100 miliardë dollarë investime dhe rreth 209 miliardë dollarë të ardhura nga taksat për shtetin venezuelian.
“Këto investime do të kontribuojnë jo vetëm në rimëkëmbjen dhe modernizimin e industrisë sonë, por edhe në rritjen ekonomike të vendit, sigurinë energjetike të hemisferës dhe një ekuilibër më të madh në tregjet ndërkombëtare”, deklaroi Rodriguez.
Një zyrtar amerikan bëri të ditur për CBS News se qeveria e SHBA-së do të kontrollojë 55% të një sipërmarrjeje të përbashkët me një “operator privat me përvojë në Venezuelë”. Sipas të njëjtit zyrtar, Rodriguez i ka dhënë kësaj sipërmarrjeje një koncesion 100-vjeçar për operimin në fushat e naftës.
Marrëveshje e pazakontë për burimet sovrane
Trump ka dhënë relativisht pak detaje mbi marrëveshjen, e cila për nga përmasat dhe struktura paraqitet si një zhvillim jashtëzakonisht i pazakontë në marrëdhëniet ndërkombëtare. Në praktikë, ajo duket se i jep Shteteve të Bashkuara një rol të drejtpërdrejtë në administrimin dhe shfrytëzimin e burimeve natyrore të një shteti të huaj.
Marrëveshja gjithashtu duket se shkon përtej modelit të përdorur nga Autoriteti i Përkohshëm i Koalicionit, i drejtuar nga SHBA-të, mbi të ardhurat e naftës së Irakut pas rrëzimit të Saddam Husseinit në pushtimin e vitit 2003.