Ukraina pret bisedime teknike me Rusinë në shtator, Moska përgjigjet: “No comment!”
Ukraina ka shprehur pritshmëri për rifillimin e bisedimeve teknike me Rusinë për çështjen e luftës, të cilat pritet të nisin në të ardhmen e afërt. Megjithatë, kreu i zyrës së presidentit ukrainas, Kyrylo Budanov, ka paralajmëruar se një marrëveshje përfundimtare nuk pritet të arrihet shpejt.
Në një intervistë dhënë për programin “Moseichuk+” në YouTube, Budanov theksoi se negociatat e ardhshme do të përqendrohen kryesisht te çështjet teknike dhe përgatitjet për hapa të mëtejshëm drejt një zgjidhjeje. “Unë besoj se të gjithë do t’i shohin negociatat të fillojnë shumë shpejt. Por ato do të kenë të bëjnë kryesisht me çështje teknike dhe përgatitje për diçka të rëndësishme, të cilën shpresoj se do ta arrijmë përfundimisht,” deklaroi ai.
Budanov e konsideroi jorealiste pritshmërinë për një përfundim të shpejtë të luftës, duke paralajmëruar se konflikti mund të zgjasë edhe gjatë dimrit.
Deri më tani, bisedimet e mbështetura nga Shtetet e Bashkuara nuk kanë sjellë rezultate konkrete për përfundimin e luftës. Raundi i fundit i negociatave trepalëshe u zhvillua në muajin shkurt.
Kremlini ka shmangur komentet lidhur me pritshmëritë e Ukrainës për një raund të ri bisedimesh në shtator, ku pritet të marrin pjesë edhe Shtetet e Bashkuara. Këshilltari i politikës së jashtme të Kremlinit, Yuri Ushakov, ka pranuar se ka parë raportime për një takim të mundshëm, por nuk ka ofruar detaje specifike.
Sipas deklarimeve nga pala ukrainase, përfaqësuesit e Ukrainës, Rusisë dhe SHBA-së mund të zhvillojnë një takim muajin e ardhshëm. Megjithatë, deri tani, Moska nuk ka konfirmuar zyrtarisht një takim të tillë.