Kriza e transportit publik: Nga 1 shtatori reduktohet me 20-30% flota e autobusëve
Operatorët e transportit publik paralajmërojnë reduktimin e flotës së autobusëve duke filluar nga 1 shtatori, për shkak të kostove të larta të operimit dhe mosrealizimit të kompensimit për karburantin. Shoqatat kërkojnë ndërhyrje urgjente nga institucionet.
Duke filluar nga 1 shtatori, operatorët e transportit publik në Tiranë do të jenë të detyruar të operojnë me një flotë të reduktuar me rreth 20-30%, në varësi të kapacitetit financiar dhe operacional aktual të secilit operator. Ky vendim vjen pas kërkesave të vazhdueshme të operatorëve për zgjatjen me të paktën tre muaj të periudhës së kompensimit të naftës, pasi kostot e operimit me flotë të plotë janë bërë të papërballueshme.
Në një letër dërguar Kryeministrisë, Ministrive të Ekonomisë dhe Infrastrukturës dhe Energjetikës, si dhe Bashkisë së Tiranës, Shoqata Kombëtare e Transportit Qytetas dhe Shoqata e Transportit Urban dhe Interurban theksojnë se masa e reduktimit nuk është një zgjedhje e operatorëve, as një mungesë vullneti për të garantuar shërbimin normal të transportit publik. Sipas shoqatave, kjo është një pasojë e drejtpërdrejtë e pamundësisë financiare për të mbuluar kostot e operimit me flotë të plotë, sidomos ato të karburantit, të cilat përbëjnë një nga zërat kryesorë të aktivitetit.
Shoqatat e transportit gjithashtu theksojnë se reduktimi i mjeteve në qarkullim pritet të sjellë në mënyrë të pashmangshme:
- Ulje të frekuencës së shërbimit.
- Rritje të intervaleve ndërmjet mjeteve.
- Mbingarkesë të mjeteve që do të mbeten në qarkullim.
- Vështirësi për qytetarët që përdorin çdo ditë transportin publik.
“Në këto kushte, u kërkojmë institucioneve përgjegjëse të ndërhyjnë me urgjencë, të japin një përgjigje konkrete mbi kërkesat e paraqitura nga operatorët dhe të mundësojnë realizimin e kompensimit të parashikuar për kostot e karburantit, si dhe vijimin e mbështetjes për periudhën në vazhdim. Operatorët kanë bërë dhe vijojnë të bëjnë çdo përpjekje për të garantuar vazhdimësinë e shërbimit, por në kushtet aktuale financiare operimi me 100% të flotës nuk është më i përballueshëm. Për sa më lart, kërkojmë trajtimin me prioritet dhe urgjencë të kësaj situate, me qëllim shmangien e përkeqësimit të mëtejshëm të shërbimit të transportit publik dhe rikthimin sa më parë të kapacitetit të plotë operacional”, theksohet në letrën e tyre.
Që prej muajit maj, shoqatat e transportit publik vijojnë të përsërisin shqetësimin për mospërballimin e kostove nga shtrenjtimi i çmimit të naftës dhe për kohëzgjatjen e periudhës për të përfituar 50 lekë për litër kompensim për naftën. Vetëm gjatë muajit gusht, Shoqata Kombëtare e Transportit Qytetas ka përsëritur dy herë kërkesën se kostoja e operimit mbetet e papërballueshme dhe se kjo shpejt do të sjellë reduktim të mjeteve për lëvizjen e qytetarëve.
Pavarësisht kërkesave dhe komunikimeve të vazhdueshme drejtuar institucioneve përgjegjëse lidhur me kompensimin e kostove të karburantit, operatorët vijojnë të përballen me mosrealizimin e kompensimit. Ndërkohë, për një pjesë të kërkesave dhe problematikave të ngritura, nuk është dhënë ende një përgjigje apo një zgjidhje konkrete institucionale. Kjo situatë, e kombinuar me nivelin e lartë të kostos së karburantit dhe shpenzimet e tjera të domosdoshme për funksionimin e aktivitetit, ka cenuar ndjeshëm likuiditetin financiar të operatorëve dhe mundësinë e tyre për të përballuar kostot ditore të operimit të të gjithë flotës së mjeteve.