“Nuk do të ulem për 12 vite”/ Murgu indian qëndron në këmbë prej 5 vitesh, betimi që po i sjell pasoja të rënda
Një murg indian ka qëndruar në këmbë pa u ulur për pesë vite, si pjesë e një betimi fetar që parashikon një periudhë totale prej 12 vitesh qëndrimi në këmbë. Daulat Giri Ji Maharaj, pjesë e një grupi hindu të njohur si “baba në këmbë” (Khareshwari), e nisi këtë praktikë në vitin 2021.
Sipas traditës, qëndrimi i zgjatur në këmbë shihet si një formë sakrifice fizike dhe disipline shpirtërore, me synimin për t’iu afruar hyjnisë Shiva. Maharaj braktisi studimet universitare për t’iu përkushtuar plotësisht këtij betimi, i cili kërkon një përballje të vazhdueshme me kufijtë fizikë të trupit.
Megjithëse është thellësisht i përkushtuar ndaj besimit të tij, praktika ekstreme ka sjellë pasoja të dukshme shëndetësore. Këmbët e murgut janë fryrë ndjeshëm dhe kanë marrë një ngjyrë të errët, si pasojë e qëndrimit të zgjatur në këmbë. Raportimet tregojnë se Maharaj tashmë ka nevojë për struktura mbështetëse, si lëkundëse dhe rripa, për të ruajtur pozicionin në këmbë.
Mjekët e kanë paralajmëruar atë për rreziqet që mund të shkaktojë qëndrimi i vazhdueshëm në këmbë. Presioni i shtuar venoz në pjesën e poshtme të trupit mund të rezultojë në ënjtje dhe dhimbje, ndërsa në raste më të rënda mund të rrisë rrezikun për probleme serioze të qarkullimit të gjakut, përfshirë trombozën.
Pavarsisht përkeqësimit të gjendjes fizike, murgut nuk i është lëkundur vendosmëria për të përfunduar betimin e tij 12-vjeçar. Ai mbështetet te ndihma e vullnetarëve, të cilët kujdesen për nevojat e tij të përditshme dhe e ndihmojnë të ruajë pozicionin në këmbë.
Rasti i Daulat Giri Ji Maharaj ka tërhequr vëmendje të madhe, duke nxjerrë në pah sakrificat ekstreme që disa praktikues fetarë ndërmarrin në emër të besimit, por edhe pasojat e rënda që mund të ketë një qëndrim i tillë për trupin e njeriut.