Bilanc tragjik: 6 viktima nga mbytja e anijes pranë Kyrenias, 159 persona të shpëtuar
Të paktën gjashtë persona kanë humbur jetën pas përmbysjes së anijes së pasagjerëve “Express” pranë brigjeve të Kyrenias, në territoret e pushtuara të Qipros.
Ngjarja tragjike ndodhi të dielën pasdite, pak kohë pasi anija, në pronësi të kompanisë Filo Jet, ishte nisur nga porti i qytetit. Incidenti u regjistrua rreth tre milje larg Kyrenias, ndërsa në bord ndodheshin 267 persona.
Deri më tani, 159 persona janë shpëtuar. Operacioni i kërkim-shpëtimit vijon në det, pavarësisht kushteve të vështira atmosferike dhe dallgëve të forta. Në vendngjarje janë angazhuar anije, helikopterë dhe mjete të tjera shpëtuese.
Personat e nxjerrë nga deti janë transportuar me ambulanca drejt spitaleve për të marrë ndihmën e nevojshme mjekësore. Republika e Qipros ka shprehur gatishmërinë e saj për të ndihmuar në operacionin e kërkim-shpëtimit, duke vënë në dispozicion kapacitetet e saj në rast nevoje.
Sipas raportimeve, Qendra e Përbashkët e Koordinimit të Shpëtimit (JRC) ka kontaktuar UNFICYP-in për t’i përcjellë palës turko-qipriote ofertën për ndihmë.
Autoritetet vijojnë të hetojnë rrethanat e përmbysjes së anijes dhe shkaqet që çuan në këtë tragjedi detare.