Veprimet bankare u rritën me 21% në gjysmën e parë të vitit
Përdorimi i kanaleve bankare të pagesave nga shqiptarët është rritur më tej në gjysmën e parë të këtij viti. Sipas informacionit nga Banka e Shqipërisë, gjatë gjashtëmujorit të parë të vitit 2026, individët dhe bizneset kryen 33.7 milionë pagesa bankare, duke shënuar një rritje prej 21% krahasuar me të njëjtën periudhë të një viti më parë.
Ndërkohë, vlera totale e transaksioneve arriti në 4.2 trilionë lekë, duke u rritur me 20% në raport me gjashtëmujorin e parë të vitit 2025.
Pagesat me karta dominojnë veprimet bankare
Në numër veprimesh, peshën kryesore në veprimet bankare të shqiptarëve vazhdojnë ta zënë pagesat me karta, me rreth 68% të totalit. Gjatë dy viteve të fundit, veprimet me kartë po dominohen nga pagesat në terminalet POS, të cilat kanë kaluar tashmë numrin e tërheqjeve të parave të kesh nga bankomatet.
Në gjashtë muajt e parë të vitit, u regjistruan gjithsej rreth 16 milionë pagesa me kartë në terminalet elektronike të shitjes (POS). Numri i pagesave me kartë është rritur me 28% krahasuar me gjashtëmujorin e parë të vitit të kaluar.
Sipas të dhënave nga Banka e Shqipërisë, në mesin e vitit 2026 numri i kartave aktive arriti në 1.69 milionë, duke u rritur me 7% krahasuar me një vit më parë.
Transfertat e kreditimit, grupi i dytë më i madh
Grupi i dytë më i madh brenda pagesave bankare janë transfertat e kreditimit të nisura nga klientët, me 29% të totalit. Këto përfshijnë pagesat e nisura nga klientët në degët e bankave ose nëpërmjet kanaleve bankare në distancë, kryesisht internet banking.
Klientët e sektorit bankar kryen gjithsej 9.8 milionë transferta kreditimit (pagesa) nga llogaritë e tyre. Këtë vit po theksohet më shumë dominimi i transfertave bankare nga veprimet në kanalet elektronike. Rreth 67% e numrit total të këtyre veprimeve u kryen në formë jo-letër, nëpërmjet kanaleve elektronike, kryesisht internet banking apo mobile banking.
Një pjesë më të vogël në strukturën e pagesave bankare zënë veprimet e debitimit direkt, pagesat me para elektronike dhe çeqet.
Rritja e përdorimit të bankave, sinjal pozitiv për ekonominë
Rritja e numrit të veprimeve të kryera nëpërmjet kanaleve bankare lidhet me zgjerimin e aktivitetit ekonomik, por edhe me uljen e veprimeve të kryera në para fizike, duke i zëvendësuar ato me pagesa bankare. Ky është një parakusht i rëndësishëm për uljen e nivelit të informalitetit në ekonomi.
Të dhënat e Bankës së Shqipërisë tregojnë se numri total i llogarive bankare në fund të vitit të kaluar arriti në 4.16 milionë, me një rritje prej 20.6% krahasuar me një vit më parë. Gjatë vitit të kaluar, numri i llogarive në sektorin bankar u zgjerua me më shumë se 710 mijë të tilla.
Rritja e numrit të llogarive bankare është në thelb një tregues i rritjes së depërtimit të produkteve dhe shërbimeve bankare në ekonomi.