Zonë e re ushtarake në Gjirin Persik: Irani paralajmëron bllokimin e Ngushticës së Hormuzit, SHBA përshkallëzon bllokadën ekonomike
Teherani zyrtar ka njoftuar krijimin e një zone të re të kufizuar në Gjirin Persik dhe hartimin e një korridori të ri lundrimi në Ngushticën e Hormuzit. Ky zhvillim vjen ndërsa rifillimi i tensioneve ushtarake mes Iranit dhe SHBA-së ka bërë që çmimi i naftës të kalojë 97 dollarë për fuçi.
Sekretari i Këshillit të Lartë të Sigurisë Kombëtare të Iranit, Mohsen Rezaei, deklaroi se zona e re e sigurisë do të shtrihet nga kufiri i bllokadës detare amerikane. Ai shtoi se çdo anije që shkel këtë hapësirë do të përballet me sanksione.
Rezaei konfirmoi gjithashtu se hartat e korridorit të ri detar, i cili do të shtrihet në ujërat e Iranit dhe Omanit, janë miratuar dhe pritet të nënshkruhen së shpejti. Ai theksoi se Ngushtica e Hormuzit do të mbetet e hapur vetëm në rast se SHBA-ja ndërpret veprimet sabotuese, kërcënimet dhe goditjet ushtarake.
Gjashtë muaj pas fillimit të konfliktit ushtarak dhe dështimit të armëpushimit, Kryetari i Parlamentit Iranian, Mohammad Baqer Qalibaf, paralajmëroi Uashingtonin se “rregullat e lojës kanë ndryshuar” dhe se çdo sulm i ri do të marrë një përgjigje më të shpejtë, më të rëndë dhe më të dhimbshme.
Në një deklaratë të veçantë, Ministri Iranian i Naftës, Mohsen Paknejad, bëri të ditur se terminali kryesor i eksportit në ishullin Kharg është goditur rreth 550 herë në muajt e fundit, por vazhdon të funksionojë pavarësisht bllokadës.
Nga ana e saj, Komanda Qendrore e SHBA-së (CENTCOM) njoftoi se ka ndaluar, devijuar apo kontrolluar dhjetëra anije tregtare për të zbatuar bllokadën ndaj eksporteve të naftës iraniane. Megjithëse Sekretari amerikan i Energjisë, Chris Wright, pretendoi se marina amerikane po siguron lundrimin e rreth dy të tretave të naftës, rënia e transitit në vetëm 10 anije në ditë ka shkaktuar tronditje në tregjet ndërkombëtare dhe ka kontribuar në rritjen e çmimeve të energjisë.