“`html
Drafti për objektet e konfiskuara në Kuvend, fondi për punimet dhe blerësit arrin 3.5 milionë euro
Qeveria ka miratuar një draft për krijimin e një fondi të veçantë që do të shfrytëzohet për përfundimin e punimeve në objektet e konfiskuara. Gjithashtu, parashikohet ngritja e një grupi pune për konstatimin e detyrimeve ndaj blerësve me kontrata porosie dhe kontratave të shitblerjes me pronarët e truallit. Pas miratimit nga Këshilli i Ministrave, projektligji me këto ndryshime është depozituar në Kuvendin e Shqipërisë.
Sipas raportit të vlerësimit të ndikimit, deri më tani janë shitur 5 objekte të konfiskuara, duke arkëtuar rreth 3.5 milionë euro. Pritet gjithashtu arkëtimi i 9 milionë eurove nga një subjekt zhvillues. Fondi i ri synon të përdorë këto burime dhe financime të tjera për përfundimin e punimeve në objektet e papërfunduara dhe për përshtatjen e tyre për përdorim ekonomik ose publik.
Agjencia e Administrimit të Pasurive të Sekuestruara dhe të Konfiskuara (AAPSK) ka marrë në administrim 26 objekte të konfiskuara dhe ka ndjekur procedurat për shitjen, transferimin, kalimin në administrim të institucioneve publike ose lidhjen e kontratave me subjektet e interesuara.
- 5 objekte janë shitur, duke gjeneruar të ardhura rreth 3.5 milionë euro.
- 2 objekte janë kaluar në pronësi ose administrim të institucioneve publike (Ministria e Shëndetësisë dhe Mirëqenies Sociale dhe Agjencia Shtetërore e Kadastrës).
- Për 3 objekte janë lidhur kontrata premtim-shitjeje.
- 3 objekte të tjera janë në proces negocimi me subjektin zhvillues “Xhelux”. Ky i fundit ka kryer 10% të pagesës dhe pritet lidhja e kontratës për shlyerjen me këste të shumës prej rreth 9 milionë euro.
AAPSK ka ndjekur procedurat edhe për 13 objekte të tjera, për të cilat ende nuk ka një vendimmarrje përfundimtare nga Komisioni i Objekteve të Konfiskuara, përfshirë 9 raste ku subjektet kanë ushtruar të drejtën e parablerjes.
Raporti thekson se, ndonëse institucionet kanë ndërmarrë hapa konkretë, pjesa e konsiderueshme e portofolit që mbetet pa vendimmarrje ose në procese të zgjatura negociimi tregon nevojën për përmirësimin e kuadrit procedural dhe institucional për të përshpejtuar vendimmarrjen dhe përdorimin efektiv të këtyre objekteve.
Përveç objekteve të konfiskuara, gjatë vitit 2024, 282 pasuri të sekuestruara dhe të konfiskuara janë dhënë me qira, duke gjeneruar 159.1 milionë lekë, një rritje prej rreth 97% krahasuar me vitin 2023. Kjo rritje e aktivitetit ka sjellë nevojën për rritjen e numrit të administratorëve dhe stafit mbështetës, si dhe për riorganizimin dhe modernizimin e strukturës.
Projektligji, me 26 nene, synon rishikimin e kuadrit ligjor për administrimin, zhvillimin dhe disponimin e objekteve të konfiskuara për të rritur efikasitetin, qartësinë juridike dhe transparencën institucionale. Ai sjell ndryshime në përkufizime, përcakton autoritetet përgjegjëse, riorganizon kompetencat e ministrisë dhe AAPSK-së, si dhe përcakton procedurat për shitjen, dhënien në përdorim, zhvillimin dhe legalizimin e këtyre objekteve.
Projektligji trajton gjithashtu të drejtat e pronarëve të truallit dhe personave të tretë, krijimin dhe përdorimin e fondit të veçantë për ndërtimet pa leje, si dhe procedurat për pajisjen e objekteve me leje ndërtimi dhe certifikatë përdorimi. Ai parashikon gjithashtu dispozita kalimtare, duke u dhënë mundësi subjekteve të vetëdeklarojnë ndërtimet pa leje brenda 6 muajve nga hyrja në fuqi e ligjit, për të përfituar të drejtën e parablerjes.
Këshilli i Ministrave do të nxjerrë aktet nënligjore të nevojshme brenda 6 muajve nga hyrja në fuqi e ligjit, i cili pritet të hyjë në fuqi 15 ditë pas botimit në “Fletoren zyrtare”.
“`