Sulmet ruse në Ukrainë: 8 të vrarë dhe dhjetëra të plagosur, Kharkivi në shënjestër
Të paktën tetë persona kanë humbur jetën dhe dhjetëra të tjerë janë plagosur si pasojë e sulmeve ruse në disa zona të Ukrainës. Një sulm i ri në qytetin e Kharkivit ka lënë të plagosur të paktën 22 persona, përfshirë fëmijë.
Kryebashkiaku i Kharkivit, Ihor Terekov, bëri të ditur se një bombë ajrore e drejtuar nga forcat ruse goditi një pallat banimi në orët e para të së hënës, duke shkatërruar dy kate të ndërtesës. Sipas tij, mes të plagosurve janë edhe gjashtë fëmijë.
Sulmet ruse ishin raportuar edhe gjatë të dielës në disa rajone të Ukrainës. Ministri i Brendshëm ukrainas, Ivan Vihivskyi, deklaroi se tre persona, mes tyre një vajzë 16-vjeçare, u vranë nga sulmet ajrore në qytetin verior të Sumyt. Në këtë sulm u dëmtua edhe një qendër për fëmijë.
Në rajonin e Odesës, autoritetet raportuan një sulm masiv, ku humbi jetën një person dhe u dëmtuan ndërtesa banimi, një dyqan, një hotel, një godinë mjekësore dhe një magazinë gruri.
Edhe kryeqyteti Kiev u përfshi nga sulmet ruse. Një grua dhe dy 16-vjeçarë u plagosën dhe u dërguan në spital. Administrata e qytetit tha se u dëmtuan 16 objekte, përfshirë 12 banesa, një magazinë dhe një objekt prodhimi.
Presidenti ukrainas Volodymyr Zelenskyy njoftoi se tre persona të tjerë humbën jetën nga sulmet në rajonin jugor të Zaporizhias. Gjithashtu, një sulm me dron rus në Kiev shkaktoi vdekjen e një personi.
Këto sulme vijnë në një kohë kur Rusia vazhdon goditjet ajrore ndaj disa qyteteve dhe rajoneve të Ukrainës.