Një Fillim i Ri: Fondacioni Mane inaguron qendrën e re të Shërbimeve PRO PAK
Personat me aftësi të kufizuara do të kenë sërish një hapësirë të dedikuar, falë mbështetjes së Fondacionit Mane. Qendra e Shërbimeve për Personat me Aftësi të Kufizuara, e menaxhuar nga Fondacioni Down Syndrome Albania, është inaguruar së fundmi.
Në ceremoninë e mbajtur ditën e sotme ishte i pranishëm edhe themeluesi i Fondacionit Mane, Samir Mane, i cili ka mbështetur këtë iniciativë që nga dita e parë. Qendra ofron kujdes të specializuar për fëmijë dhe individë me aftësi të kufizuara, duke përfshirë jo vetëm ata me sindromën Down, por gjithë spektrin e këtyre aftësive.
Aktualisht, në këtë hapësirë ofrohet mbështetje për mbi 30 fëmijë, dhe shumë prej tyre përfitojnë terapi falas. Ky inagurim shënon një moment të rëndësishëm që reflekton përpjekjet e vazhdueshme të Fondacionit Mane dhe stafit të Fondacionit Down Syndrome Albania për përmirësimin e jetës së personave me aftësi të kufizuara.
Gjatë viteve, Fondacioni ka kontribuar në mënyra të ndryshme, duke ofruar mjete didaktike dhe zhvilluese, duke mbështetur programet terapeutike dhe duke ndihmuar në krijimin e mundësive të punësimit për individë me sindromën Down. Synimi kryesor është që ata të integrohen më lehtë në shoqëri dhe të kenë akses në punë që u mundësojnë pavarësi.
Në kuadër të përpjekjeve të vazhdueshme për të mbështetur komunitetin, punonjësit e BALFIN do të marrin pjesë këtë të dielë në Maratonën e Tiranës, duke vrapuar për kauzën e sindromës Down.
Ndikimi i Fondacionit shtrihet në të gjithë rajonin, dhe qasja e tij mbetet e qëndrueshme: kontribute të vazhdueshme që ndihmojnë në krijimin e një ndryshimi të prekshëm dhe pozitiv në jetën e personave me aftësi të kufizuara.