Policia dhe protestuesit përleshen jashtë hotelit të azilkërkuesve në Dublin
Policia dhe protestuesit u përleshën jashtë një hoteli që strehon azilkërkues në jugperëndim të Dublinit, ku rreth 1,000 persona morën pjesë në një demonstratë pas akuzave për një sulm seksual ndaj një vajze 10-vjeçare.
Protestuesit, të cilët mbanin flamuj irlandezë dhe pankarta me sloganin “Jetët irlandezë kanë rëndësi”, brohorisnin “nxirrini jashtë”. Ata hodhën shishe dhe fishekzjarre drejt policisë, e cila ishte e pajisur me pajisje speciale.
Një furgon policie u dogj gjatë përleshjeve. Korrespondentët raportuan se oficerët e policisë sulmuan protestuesit dhe përdorën sprej me piper për t’i larguar ata nga zona e hotelit.
Kryeministri irlandez Micheal Martin e cilësoi ngjarjet si “jashtëzakonisht serioze dhe shumë, shumë të rënda”.
Sipas mediave lokale, 26-vjeçari i akuzuar për sulmin ndaj vajzës ishte një azilkërkues. Incidenti besohet se ka ndodhur në ambientet e Hotel Citywest, që strehon aplikantë për azil në Saggart.
Një 26-vjeçar u paraqit në gjykatë të martën në lidhje me akuzat për sulm seksual. Viktima e dyshuar ishte në kujdesin shtetëror në kohën e incidentit. Agjencia për fëmijët dhe familjen Tusla konfirmoi se vajza “u arratis” gjatë një udhëtimi në qendër të qytetit dhe u raportua e zhdukur.
Duke folur në parlament, Martin pranoi “shqetësimin, zemërimin dhe indinjatën e shumë njerëzve në të gjithë vendin për atë që dyshohet se ka ndodhur këtu”. Ai shtoi: “Është e qartë se ka pasur dështim këtu në aspektin e detyrimit të shtetit për të mbrojtur këtë fëmijë”.
Ministri i Drejtësisë dhe Migracionit, Jim O’Callaghan, “dënoi” trazirat e së martës, duke përmendur predhat e hedhura drejt policisë. Ai deklaroi se “përdorimi i një krimi si armë nga njerëz që dëshirojnë të mbjellin mospajtim në shoqërinë tonë nuk është i papritur”.
Irlanda dhe Mbretëria e Bashkuar kanë parë një rritje të ndjenjave anti-emigracion në vitet e fundit. Hotelet që strehojnë azilkërkues janë bërë shpesh pika qendrore të protestave dhe trazirave. Në qershor, dhjetëra oficerë u plagosën në trazirat anti-emigracion në Irlandën e Veriut, pas akuzave për tentativë përdhunimi ndaj një vajze të re.
Policia nuk konfirmoi kombësinë e të akuzuarit në rastin e Irlandës, i cili kërkoi një përkthyes rumun në gjykatë. Kjo ngjarje shkaktoi atë që autoritetet e përshkruan si shënjestrim “racist” të shtëpive dhe bizneseve nga protestuesit.