Akuza për rrëmbim dhe vrasje, ekzekutohet me azot i burgosuri në Alabama
Një burrë i dënuar me vdekje për rrëmbim dhe vrasje u ekzekutua në Alabama të enjten me anë të asfiksisë me azot. Kjo metodë, e përdorur për herë të parë në Shtetet e Bashkuara, është përshkruar nga ekspertët e OKB-së si një formë “torture”.
Anthony Boyd, 54 vjeç, u dënua për rrëmbimin dhe vrasjen e Gregory Hooghly. Viktima u dogj i gjallë nga rrëmbyesit e tij për një borxh prej 200 dollarësh, që lidhej me një rast trafikimi droge të vitit 1993.
Avokatët mbrojtës të Boyd argumentuan se ai u dënua bazuar në dëshminë e një të bashkëpandehuri, pa pasur asnjë provë të pranisë së tij në vendin e krimit. Ata theksuan se në natën e vrasjes së Hooghly, Boyd ndodhej në një festë.
Në fjalët e tij të fundit, Boyd shpalli pafajësinë dhe kritikoi sistemin e drejtësisë penale. “Unë nuk vrava askënd. Nuk mora pjesë në vrasjen e askujt,” deklaroi ai. “Nuk mund të ketë drejtësi derisa ta ndryshojmë këtë sistem.”
Ekzekutimi me azot duket se ka zgjatur më shumë se ekzekutimet e mëparshme të kryera me këtë metodë. Shteti nuk ka zbuluar kohën e saktë kur filloi të rrjedhë gazi.