Moska teston me sukses raketën e re bërthamore, Putin: “Armë unike që s’e ka askush në botë”
Rusia ka testuar me sukses raketën e saj bërthamore Burevestnik, një armë me potencial bërthamor për të cilën Moska pretendon se mund t’i shmanget çdo sistemi mbrojtës. Presidenti Vladimir Putin deklaroi të dielën se kjo raketë do të vihet në përdorim.
Gjenerali Valery Gerasimov, shefi i Shtabit të Përgjithshëm të Forcave të Armatosura Ruse, informoi Putinin se gjatë testit të zhvilluar më 21 tetor, raketa udhëtoi 14.000 km dhe qëndroi në ajër për rreth 15 orë.
Raketa 9M730 Burevestnik (e njohur nga NATO si SSC-X-9 Skyfall) pretendohet nga Rusia se është “e pamposhtur” ndaj mbrojtjeve raketore aktuale dhe të ardhshme. Ajo ka një rreze veprimi thuajse të pakufizuar dhe një trajektore fluturimi të paparashikueshme.
“Është një armë unike që askush tjetër në botë nuk e ka,” theksoi Putin, i veshur me uniformë kamuflazhi gjatë një takimi në pikën komanduese me gjeneralët që mbikëqyrin luftën në Ukrainë. Këto komente u publikuan nga Kremlini të dielën.
Putin shtoi se disa specialistë rusë dikur mendonin se realizimi i kësaj arme ishte i pamundur, por tani “testimi i saj vendimtar” ka përfunduar.