Ahmetaj i përgjigjet ftesës së Dumanit për t’u bërë bashkëpunëtor i drejtësisë
Ish-zv.kryeministri Arben Ahmetaj ka reaguar në lidhje me deklaratën e kreut të SPAK, Altin Dumani, i cili më herët u shpreh në parlament se ish-zv.kryeministri “është i mirëpritur nëse dëshiron që të bëhet bashkëpunëtor i drejtësisë”.
Në një intervistë telefonike për emisionin “Çim Peka Live”, Ahmetaj ka deklaruar se nuk ka arsye të bëhet bashkëpunëtor pasi nuk ka kryer asnjë krim. Ai shtoi se “bashkëpunëtor” sipas ligjit quhet dikush që ka kryer krim, duke përmendur rastet kur Dumani ka pasur “bashkëpunëtorë të drejtësisë”.
Ahmetaj kritikon deklaratën e Dumanit, duke theksuar se ajo cenon prezumimin e pafajësisë. Ai tha se Dumani e ka marrë çështjen e tij me “urdhër politik” dhe se gjatë thirrjes së tij në SPAK, nuk i është bërë asnjë pyetje. “Për çfarë jam i mirëpritur unë, për të qenë bashkëpunëtor i kujt drejtësie? Për çfarë krimi?” pyeti ai.
Ish-zv.kryeministri konsideron reformën në drejtësi si një dështim, drejtues i të cilit është Altin Dumani, duke akuzuar për “dy standarde” dhe “standarde sipas qejfit dhe urdhrit politik”. Ai shtoi se kushdo që është “armik i Ramës, arrestohet duke u tërhequr zvarrë në rrugë”.
Ahmetaj mohoi të ketë pasur ndonjë firmë lidhur me Inceneratorët dhe shtroi pyetjen pse SPAK nuk merret me çështjen McGonigal. Ai sugjeroi Dumanin që të bëhet vetë bashkëpunëtor i Drejtësisë kur të akuzohet për shpërdorim detyre, duke shtuar se kur të mbrohet vetë, do të vijë dhe do të tregojë gjithçka.
Më herët, Altin Dumani u shpreh se lidhur me aferën e inceneratorëve, SPAK ka hetuar 71 persona dhe se hetimet për inceneratorin e Tiranës vijojnë ende. Ai shtoi se deklarimet publike të Arben Ahmetajt vlerësohen rast pas rasti dhe se ai aktualisht është “person në kërkim ndërkombëtar për disa vepra penale”. Dumani ritheksoi se “në çdo moment që një subjekt dëshiron të bëhet bashkëpunëtor i drejtësisë është mëse i mirëpritur”.