“`html
Nis gjyqi për grupin që piratoi kompjuterat e SPAK
Gjykata e Posaçme e Shkallës së Parë Kundër Korrupsionit dhe Krimit të Organizuar (GJKKO) ka pranuar kërkesën e Prokurorisë së Posaçme (SPAK) për çështjen e hakerimit dhe vjedhjes së të dhënave të tre prokurorëve të Posaçëm. Vendimi u mor këtë të premte, duke pranuar kërkesën e SPAK dhe duke kaluar çështjen për gjykim si grup i strukturuar kriminal.
Prokuroria e Posaçme kundër Korrupsionit dhe Krimit të Organizuar përfundoi hetimet dhe dërgoi në janar të këtij viti pranë Gjykatës së Posaçme të Shkallës së Parë kërkesën për gjykimin e procedimit penal në ngarkim të të pandehurve:
- Arnold Rrokaj: Hetuar me masën e sigurimit “Arrest në burg”. Akuzohet për veprat penale “Hyrja e paautorizuar kompjuterike”, paragrafi i dytë dhe “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 192/b paragrafi 2, 293/a paragrafi 2, 28/4, 333/a dhe 334 të Kodit Penal.
- Zambak Gjoni: Hetuar me masën e sigurimit “Arrest në burg”. Akuzohet për veprat penale “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 293/a paragrafi 2, 28/4, 333/a dhe 334 të Kodit Penal.
- Agim Ismaili: Ish kreu i Burgjeve, hetuar në gjendje të lirë. Akuzohet për veprat penale “Përgjimi i paligjshëm i të dhënave kompjuterike”, paragrafi i dytë, të kryer në formën e posaçme të bashkëpunimit, atë të grupit të strukturuar kriminal, “Grupi i strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, të parashikuara nga nenet 293/a paragrafi 2, 28/4, 333/a dhe 334 të Kodit Penal.
I pandehuri Arnold Rrokaj, sipas akuzës, aksesoi në mënyrë të paautorizuar materiale hetimore të Prokurorisë së Posaçme kundër Korrupsionit dhe Krimit të Organizuar. Një pjesë e këtyre materialeve u dërguan në mënyrë të paligjshme tek të pandehurit Zambak Gjoni dhe Agim Ismaili, të cilët më pas i shpërndanë ato tek persona të tretë.
Shtetasit Zambak Gjoni dhe Arnold Rrokaj u identifikuan dhe arrestuan shpejt, brenda 24 orësh, duke parandaluar kështu shpërndarjen e mëtejshme të materialeve hetimore.
Si rezultat i veprimeve hetimore, akuzat u zgjeruan edhe për veprën penale të përgjimit të paligjshëm të të dhënave kompjuterike në ngarkim të shtetasit Agim Ismaili. Ai, pasi u njoh me përmbajtjen e këtyre të dhënave, jo vetëm që i shpërndau ato më tej, por edhe kërkoi thellimin e përgjimit të paligjshëm të sistemeve të Prokurorisë së Posaçme, duke kërkuar të dhëna për persona të ndryshëm.
Prokuroria e Posaçme mori informacion më datë 12 mars 2025 se ishte vënë në shënjestër e një ndërhyrje të paligjshme në adresat e email-eve të prokurorëve të posaçëm. Falë masave të sigurisë, nuk u arrit të ndërhyhej në sistemin e brendshëm të SPAK, i cili mbetet i pacenuar. Nga verifikimet rezultoi se është ndërhyrë vetëm në adresat e emaile-ve të disa prokurorëve, por jo në sistemin e përgjithshëm të IT-së të institucionit. Personat përgjegjës kanë arritur të marrin disa informacione, pa mundur të sigurojnë akses në dosje hetimore. Ata kanë tentuar të ndërhyjnë edhe në email-in e ish Drejtuesit të Prokurorisë së Posaçme, Altin Dumani, por pa sukses.
Falë një hetimi intensiv të drejtuar nga Prokuroria e Posaçme, me përfshirjen e Byrosë Kombëtare të Hetimit (BKH) dhe Sektorit të Ekspertizës, u zbulua kjo ndërhyrje e paligjshme. Brenda 24 orësh u identifikuan dhe arrestuan dy shtetas – individi që ka realizuar ndërhyrjen në email-e dhe ai që ka shpërndarë informacionin tek persona të tretë. Gjithashtu, u sekuestruan pajisjet e përdorura për ndërhyrjen si dhe skedarët e shkarkuar.
Prokurori i çështjes, me qëllim ruajtjen e sekretit hetimor, ka urdhëruar personat që kanë rënë në posedim të këtyre informacioneve të mos i publikojnë ato. Ndërkohë, janë marrë në pyetje edhe individë të tjerë që mund të kenë pasur lidhje me personat e arrestuar dhe kanë poseduar informacionet.
Paralelisht me procedimin penal, Prokuroria e Posaçme nisi hetimin e brendshëm administrativ, i cili konfirmoi se sistemi i përgjithshëm i IT-së nuk është cenuar. Janë marrë masa shtesë për forcimin e protokolleve mbrojtëse të sistemeve IT të institucionit.
Deri në këtë fazë të hetimit nuk ka asnjë të dhënë që personat e arrestuar të kenë bashkëpunuar me personel të brendshëm të SPAK. SPAK siguron publikun dhe të gjitha palët e interesuara se janë marrë të gjitha masat për të mbrojtur dosjet, të dhënat e ndjeshme dhe për të ruajtur integritetin e infrastrukturës së institucionit.
Hetimet lidhur me këtë çështje vijojnë në kuadër të dyshimeve për ekzistencën e një grupi të strukturuar kriminal.
“`