“`html
Nga fillimi me Kombëtaren: Alen Sherri realizoi një ëndërr, do të kërkojë më shumë minuta te Kaljari
Alen Sherri debutoi me fanellën e Shqipërisë si titullar në takimin ndaj Izraelit, duke u shfaqur si një nga lojtarët më të mirë në fushë. Portieri shkodran shënoi disa pritje të rëndësishme, duke qenë vendimtar në disa momente.
Në një intervistë pas ndeshjes, Sherri u shpreh i lumtur, duke pranuar se ka realizuar një ëndërr me debutimin te Kombëtarja. Ai foli për ndeshjen e tij:
“Fakti ishte se ishte ndeshja e parë. Vij nga një periudhë shumë e gjatë që nuk jam aktivizuar rregullisht dhe normalisht nuk ishte e lehtë. Por ajo që më dha më shumë shtysë ishte fakti që po bëja debutimin me Kombëtaren dhe ishte një ndjesi krejt e veçantë. Kisha shumë emocione, që do të thotë se në momentin që këndova himnin për herë të parë në fushë ishte diçka tjetër dhe u pushtova krejtësisht nga emocionet. Pastaj më vjen shumë mirë për paraqitjen. Besoj se ishte pozitive për mua. Ndihem shumë keq për rezultatin, sepse nga mënyra se si u zhvillua loja, mendoj që minimumi që duhet të merrnim ishte një barazim dhe besoj se ai minimum ishte i merituar. Por u ndëshkuam me një gol dhe fatkeqësisht rezultati është 1-0.”
Duke iu kthyer trajnerit të ri, i cili i besoi fanellën e titullarit që në ndeshjen e parë, Sherri tregoi:
“Po, kemi pasur një bisedë. Me trajnerin na lidh edhe fakti që ai ka qenë më parë te ekipi ku unë jam aktualisht. Kishim një bisedë më shumë për klubin sesa për këtë aktivizim, sepse nuk e dija për aktivizimin deri para ndeshjes. Jam shumë i lumtur dhe është një përgjegjësi shumë e madhe. Normalisht ishte një ndjesi tepër e veçantë, por shpresoj t’ia kem shpërblyer sadopak besimin që ma dha.”
Lidhur me të ardhmen dhe mundësinë e më shumë minutave në fushë, portieri theksoi:
“Nuk kemi pasur një bisedë për këtë gjë, por besoj që ajo është normale. Është diçka që edhe unë e kërkoj nga vetja, pasi vij nga një periudhë goxha e gjatë që nuk jam aktivizuar dhe besoj se objektivi kryesor është aktivizimi. Nëse te ekipi do të kem pak hapësira, besoj që edhe unë dhe klubi do të gjejmë një mënyrë. Kjo do të jetë një nga kërkesat e mia kryesore për sezonin e ardhshëm.”
Përsa i përket shkaqeve të humbjes me Izraelin, Sherri shtoi:
“Unë besoj se çdo ndryshim i tillë kërkon kohë. Është një trajner i ri, me ide të reja. Po provon me ne gjëra të reja dhe kur provon gjëra të reja mund të ketë edhe gjëra që nuk funksionojnë mirë. Mendoj se bëmë disa gabime dhe ishim pak të ulët në mbrojtje në disa momente. Pastaj kundërshtari përfitoi nga ato situata. Kështu që do të korrigjojmë të gjitha gjërat që nuk shkuan mirë në fazën mbrojtëse, por besoj se është thjesht ndeshja e parë me këtë ide të re.”
“`