“`html
Mbështetja e sektorit bankar me financime nga Banka e Shqipërisë është më e ulët këtë vit
Mbështetja e sektorit bankar me likuiditet nga Banka e Shqipërisë ka shënuar nivele më të ulëta gjatë muajve të parë të këtij viti. Sipas të dhënave nga bilanci i Bankës së Shqipërisë, në fund të muajit korrik, huaja nëpërmjet marrëveshjeve të anasjellta të riblerjes (REPO) arriti vlerën e 25 miliardë lekëve. Ky nivel paraqet një rënie prej 20.6% krahasuar me një vit më parë dhe 58% krahasuar me fundin e vitit të kaluar.
Me përjashtim të muajit qershor, huamarrja e bankave nga Banka e Shqipërisë ka qëndruar në nivele të ulëta për shtatë muajt e parë të vitit. Në raportin e fundit të politikës monetare, Banka e Shqipërisë vlerëson se nevojat e sistemit bankar për likuiditet kanë qenë më të ulëta në muajt e parë të këtij viti. Kjo situatë reflekton reduktimin e huamarrjes dhe rritjen e disbursimit të shpenzimeve të qeverisë në tregun e brendshëm gjatë kësaj periudhe.
Huamarrja e bankave nga Banka e Shqipërisë realizohet zakonisht nëpërmjet instrumentit të marrëveshjeve të anasjellta të riblerjes. Instrumentet e tjera, si kredia njëditore, përdoren më rrallë. Rënia e financimit të sektorit bankar nga banka qendrore sugjeron se situata e likuiditetit të sektorit në monedhën vendase është e mirë. Megjithatë, niveli i mbështetjes së sektorit bankar me likuiditet afatshkurtër ka tendencën të jetë i luhatshëm dhe shpeshherë i varur nga ecuria e instrumenteve fiskale, si huamarrja e brendshme apo balanca buxhetore.
Në vitet e fundit, një nga faktorët kryesorë që ka ndikuar në mungesën e likuiditetit në monedhën vendase ka qenë suficiti i lartë i akumuluar nga buxheti në pjesën më të madhe të vitit. Mbështetur në raportimet e Ministrisë së Financave, në fund të muajit qershor suficiti buxhetor kaloi vlerën e 51 miliardë lekëve, duke shënuar nivelin më të lartë të regjistruar ndonjëherë për gjashtëmujorin.
Deri tani këtë vit, efekti i suficitit të lartë nuk ka qenë shumë i fortë në tkurrjen e likuiditetit në treg. Kjo mund të jetë ndikuar pjesërisht nga operacionet e blerjes së valutës nga Banka e Shqipërisë dhe nga një rritje e kënaqshme e depozitave të sektorit privat. Banka Qendrore ka vazhduar të blejë sasi të mëdha valute gjatë vitit, me qëllim për të frenuar tendencën e vazhdueshme të forcimit të lekut në kursin e këmbimit. Ky veprim ka kontribuar në rritjen e lartë të ofertës monetare në ekonomi. Paralelisht, statistikat e Bankës së Shqipërisë tregojnë se në fund të muajit qershor, depozitat në monedhën vendase arritën vlerën e 968 miliardë lekëve, duke shënuar një rritje vjetore prej 13%.
“`