Djegia e pallatit, banorët e prekur nënshkruajnë një peticion me 10 kërkesa urgjente
Banorët e prekur nga zjarri i rënë në kompleksin “Arlis”, në zonën e Farmacisë 10, kanë nënshkruar sot një peticion duke shtruar disa pika. Kërkesat e tyre përfshijnë dëmshpërblimin e qirasë derisa apartamentet të rindërtohen dhe formalizimin e çdo detaji të këtij procesi. Ata i kushtojnë rëndësi të theksuar edhe certifikimit dhe kolaudimit të sistemeve të sigurisë elektrike dhe asaj kundër zjarrit apo fatkeqësive të tjera natyrore.
Përshëndetje banorë të kompleksit Arli! Mendojmë se kërkesat tona, të përmbledhura, janë si më poshtë:
- Ekspertizë e pavarur dhe e detajuar teknike për të vlerësuar sigurinë e materialeve termoizoluese të përdorura në fasadë.
- Zëvendësimi i menjëhershëm i çdo materiali të rrezikshëm me materiale të certifikuara dhe rezistente ndaj zjarrit, sipas standardeve europiane.
- Audit i plotë i sistemit të mbrojtjes kundër zjarrit, përfshirë: sistemet e alarmit, pajisjet e fikjes së zjarrit, rrugët e evakuimit.
- Transparencë nga kompania ndërtuese, mbi materialet e përdorura dhe kontrollin e cilësisë gjatë ndërtimit.
- Përgjegjësi ligjore dhe administrative, nëse konstatohet neglizhencë apo shkelje e standardeve të sigurisë, për mos certifikimin e impianteve elektrike, etj.
- Zhdëmtimi i të gjithë banorëve dhe bizneseve të dëmtuara.
- Kontratat e porosisë të formalizohen pranë noterit.
- Apartamentet të rikthehen në gjendjen e mëparshme, sipas përmbajtjes së kontratës.
- Të sigurohet strehimi dhe të mbulohen shpenzimet e qirasë për banorët, apartamentet e të cilëve janë dëmtuar/djegur.
- Kompleksi të pajiset me hidrantë dhe fikse zjarri funksionale, pasi aktualisht kanë qenë jashtë funksionit.
Doja të shtoja që Normat e Sigurisë Europiane EN duhen përdorur tek ne si në çdo vend Europian, për shembull: Detyrimi i Kontrollit të instalimeve të ujit, energjisë elektrike, gazit, ashensorit etj. Për të gjitha instalimet e kryera, duhet certifikata Sigurie dhe garancie sipas standardeve evropiane. Duhet me të vërtetë një projektligj, që pas maksimum 20 vitesh të kryhet kontroll i detyrueshëm i gjendjes së të gjitha instalimeve të kryera. Salvavita e detyrueshme për të gjitha instalimet elektrike qendrore dhe në çdo banesë. Matja e tokëzimit, i cili është pjesa më e rëndësishme e të gjitha instalimeve elektrike.
Me respekt,
Banorët e pallatit “Arlis” (Tiranë, zona “Farmacia 10”)