“`html
Ekskluzive/ Pas mbrojtjes së Belinda Ballukut, Brukseli i vendos kritere shtesë Shqipërisë
Lapsi.al mëson se në takimin e radhës të grupit COELA është diskutuar një raport i ndryshuar i Presidencës së BE-së, ku vendet anëtare kanë shprehur sërish rezerva. Situata në Shqipëri po vëzhgohet me shumë kujdes në Bruksel. Është tashmë e qartë se mbrojtja e imunitetit të zëvendëskryeministres Belinda Balluku është vënë në dukje nga vendet kryesore të Unionit, të cilat i kanë caktuar “detyra shtesë” qeverisë së Edi Ramës për të vijuar procesin e integrimit.
Lapsi.al mësoi se këtë të premte (17 prill) në Bruksel u zhvillua një tjetër takim teknik i Grupit Punues për Zgjerimin dhe Vendeve në Negociata, i njohur si COELA. Në këtë takim u diskutua një projekt për Pozicionin e Përbashkët të BE-së (Draft Common Position) për miratimin e udhërrëfyesve të Kapitullit të Parë për Shqipërinë. Ky kapitull, i quajtur “Themeloret”, është ndër më të rëndësishmit pasi përfshin shtetin e së drejtës, drejtësinë dhe institucionet demokratike.
Një burim i brendshëm zbuloi për lapsi.al detaje nga diskutimet, duke nënvizuar se disa vende të BE-së nuk kanë dhënë dakordësinë për projektin, edhe pse tashmë janë zhvilluar disa mbledhje. Sipas burimit, Presidenca e BE-së prezantoi në takim një draft të rishikuar të IBAR, i cili ishte ndryshuar në përputhje me komentet e Shteteve Anëtare të bëra në takimet e kaluara.
“Komisioni vlerësoi se teksti i kompromisit është i pranueshëm në formën e tij aktuale, ndër të tjera sepse disa tema adresohen më mirë në kapituj të tjerë specifikë, për të mos mbingarkuar kërkesat e Grupit të Parë,” u shpreh burimi për lapsi.al.
Përfaqësuesit e shteteve anëtare nuk kishin ende qëndrime përfundimtare, pasi teksti u ishte dorëzuar vetëm një mbrëmje më parë. Megjithatë, në diskutimin që u zhvillua, përfaqësuesit e Gjermanisë, Francës, Polonisë, Austrisë, Holandës, Belgjikës, Luksemburgut, Greqisë, Estonisë dhe Suedisë konstatuan gjerësisht se teksti me detyrat për qeverinë e Tiranës “kishte lëvizur në drejtimin e duhur”.
Nga ana tjetër, Italia, Estonia dhe Hungaria vlerësuan se projekti ishte tepër kërkues dhe i detajuar, veçanërisht në krahasim me Pozicionin e Përbashkët të Malit të Zi. I njëjti burim zbuloi se vende të rëndësishme si Holanda, Gjermania dhe Franca patën propozime për ndryshime edhe në disa tema të tjera. Ndërkohë, për Austrinë dhe Poloninë ishte e rëndësishme gjetja e një ekuilibri më të mirë për kriteret ekonomike (kriteret e mbylljes).
Në këtë pikë të diskutimit, Presidenca e Bashkimit Europian u kërkoi Shteteve Anëtare të dërgojnë komentet e reja me shkrim deri në mesditën e datës 22 prill. Projekti për Shqipërinë do të jetë sërish në rendin e ditës të COELA-s në mbledhjen e 28 prillit. Qëllimi është të gjendet një tekst kompromisi midis Komisionit dhe Vendeve Anëtare mbi detyrat që i duhen lënë Shqipërisë, të cilat, sipas asaj që mëson lapsi.al, kanë ardhur në rritje.
Ndryshe nga ajo që po ndodh në Bruksel, në Tiranë, kryeministri Edi Rama nuk lë rast pa përsëritur se procesi i integrimit “nuk ka frenim”. Kriteret në rritje të BE-së ndaj Shqipërisë, sipas Ramës, janë thjesht “pyetje shtesë” që vendet anëtare po bëjnë.
E vërteta është se ndryshe nga Mali i Zi, që po ecën me mbylljen e kapitujve dhe në fillim të qershorit pret të zhvillojë tryezën e radhës ndërqeveritare me BE-në, në Tiranë, duket se prej votës për mbrojtjen e zëvendëskryeministres së akuzuar për korrupsion, procesi i integrimit ka mbetur në vendnumëro.
“`