Berati, bashkia e dominuar nga socialistët që nga viti 2000
Beratit ka zgjedhur kryebashkiakun e fundit demokrat në vitin 1996. Që atëherë, socialistët kanë dominuar politikisht qytetin, duke treguar një epërsi të vazhdueshme dhe në rritje, si në zgjedhjet vendore ashtu edhe në ato kombëtare.
Bashkia e Beratit u drejtua për 12 vjet nga Fadil Nasufi (2003-2015), i cili kishte filluar karrierën e tij politike në Partinë e Punës, duke qenë kryetar i Bashkimit Rinor të kësaj partie gjatë viteve të fundit të regjimit komunist. Aktualisht, Nasufi shërben si deputet për Partinë Socialiste.
Reforma territoriale e vitit 2015, e cila bashkoi ish-komunat Otllak, Rroshnik, Sinjë dhe Velabisht me bashkinë e re të Beratit, duket se ka forcuar më tej pozicionet e Partisë Socialiste. Gjatë zgjedhjeve të atij viti, kandidati i opozitës, Kasëm Mahmutaj, ofroi një garë të ngushtë, duke humbur me një diferencë minimale në qytetin e Beratit përballë Petrit Sinajt, kandidat i Lëvizjes Socialiste për Integrim (LSI), i cili garonte brenda aleancës PS-LSI. Sinaj fitoi me 54% të votave, kryesisht falë mbështetjes së fortë në zonat rurale.
Edhe në vitet 2007 dhe 2011, pavarësisht se Partia Demokratike kishte kontrollin e qeverisë qendrore, gjë që zakonisht i favorizonte, ata nuk arritën të merrnin shumicën në territorin e bashkisë së sotme të Beratit. Në vitin 2007, kandidatët e së djathtës morën 43% të votave kundrejt 47% të socialistëve, ndërsa në vitin 2011, votat u ndanë 47% për të djathtën dhe 50% për socialistët, me 3% të marra nga kandidatë të pavarur.
Berati është një zonë me rënie të vazhdueshme popullsie, si pasojë e migrimit të brendshëm dhe emigrimit. Sipas regjistrimit të vitit 2023, bashkia numëron 62,000 banorë rezidentë, ndërkohë që regjistri civil tregon 100,000 shtetas. Kjo rënie demografike reflektohet edhe në uljen e pjesëmarrjes në zgjedhje. Në vitin 2015, votuan 35,000 qytetarë, ndërsa në zgjedhjet e vitit 2023, numri i votuesve ra në 28,000. Për zgjedhjet parlamentare të vitit 2025, numri i votuesve rezidentë ishte 29,000.
Pavarësisht rënies, trendi i votave për të majtën ka qenë në ulje, nga 19,000 vota në vitin 2015 në pak më shumë se 15,000 në vitin 2025. Megjithatë, votat për të djathtën kanë rënë edhe më ndjeshëm.
Bashkia e Beratit po shkon drejt zgjedhjeve të pjesshme të 9 nëntorit pas dorëheqjes së ish-kryebashkiakut Ervin Demo, i cili tani është deputet dhe ministër shteti për Pushtetin Vendor. Kandidatët për zgjedhjet e së dielës janë Ervin Ceca nga Partia Socialiste dhe Pavllo Shkarpa, i cili kandidon si i pavarur, por mbështetet nga opozita kryesore.