Titulli: Krishtlindjet nuk duhet të ndalen kurrë; Ndizet pema në Betlehem, për herë të parë që nga fillimi i luftës në Gaza
Për dy vjet, gjatë periudhës së luftës në Gaza, të gjitha festimet publike të Krishtlindjeve në Betlehem, qytetin ku besimtarët krishterë besojnë se lindi Jezusi, u anuluan. Megjithatë, pas armëpushimit të fundit, qyteti i shenjtë ka vendosur që këtë vit festimet të rikthehen, duke u simbolizuar nga ndezja e pemës tradicionale gjigante të Krishtlindjeve para Kishës historike të Lindjes.
“Kanë qenë dy vite të errëta me heshtje; pa Krishtlindje, pa punë,” deklaron kryetari i bashkisë së Betlehemit, Maher Canawati. “Ne të gjithë jetojmë nga turizmi dhe ky kishte rënë në zero.”
Kryebashkiaku pranon se ideja e rifillimit të festimeve nuk ishte pa polemika, duke pasur parasysh vuajtjet që vazhdojnë në Gaza, përfshirë edhe komunitetin e vogël të krishterë, shumë prej të cilëve kanë të afërm në Betlehem.
“Disa mund të thonë se nuk është e përshtatshme dhe të tjerë se është e përshtatshme,” u shpreh zoti Canawati. “Por thellë në zemrën time, ndjeva se kjo ishte gjëja e duhur për të bërë, sepse Krishtlindjet nuk duhet të ndalen ose anulohen kurrë. Kjo është drita e shpresës për ne.”
Me tensionet që ende mbeten të larta në të gjithë rajonin, banorët e Betlehemit shprehen se po luten për paqe dhe shpresojnë që turistët të kthehen në vendin ku besohet se filluan Krishtlindjet.