Ngrihet sërish çmimi i naftës
Çmimet e naftës janë rritur sërish sot me 4 lekë për litër, vetëm një ditë pasi ishin ulur, duke e çuar çmimin e shitjes me pakicë në 197 lekë për litër.
Sipas një njoftimi për shtyp, Bordi i Transparencës, në mbledhjen e datës 9 Maj 2026, ka vendosur këto çmime të reja:
- Çmimi i shitjes me pakicë i gazoil-it të standardit SSH EN 590 do të jetë jo më shumë se 197 lekë/litër, ndërsa i shitjes me shumicë jo më shumë se 185 lekë/litër.
- Çmimi i shitjes me pakicë i benzinës së standardit SSH EN do të jetë jo më shumë se 182 lekë/litër, ndërsa i shitjes me shumicë jo më shumë se 170 lekë/litër.
Këto çmime do të hyjnë në fuqi sot, më 9 Maj, në orën 14:00 dhe do të jenë të vlefshme deri në mbledhjen e radhës të bordit, ku do të pasqyrohen ndryshimet e mundshme të çmimeve.
Bordi i Transparencës tërheq vëmendjen e të gjithë operatorëve të shitjes me shumicë dhe pakicë të naftës mbi detyrimin e zbatimit të këtij vendimi. Në rast të shkeljeve të konstatuara, do të vendoset pezullimi i aktivitetit.
Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, janë angazhuar për mbrojtjen e interesave të konsumatorëve shqiptarë dhe ruajtjen e parimeve të konkurrencës së ndershme në treg.
SQARIM:
Referuar Aktit Normativ nr. 1, datë 3.4.2026, “Për një shtesë në ligjin nr. 61/2012, ‘Për akcizat në Republikën e Shqipërisë,’ të ndryshuar”, parashikohet se në rast se çmimi i shitjes me pakicë për gazoil-in është më i lartë se 220 lekë/litër, ose për benzinën është më i lartë se 200 lekë/litër, zbatohet niveli 80% i akcizës.
Bazuar në metodologjinë për llogaritjen e çmimeve tavan të shitjes me pakicë, çmimet aktuale janë nën kufirin e përcaktuar nga Akti Normativ nr. 1, datë 3.4.2026. Për rrjedhojë, niveli i akcizës do të zbatohet i plotë, pra 100%.