“`html
Egnatia shkruan histori, plotëson mrekullinë në “Final Four” dhe shpallet sërish kampione
Skuadra e Egnatias është shpallur kampione për edicionin e tretë radhazi në Abissnet Superiore. Ajo ka triumfuar në formatin e ri të “Final Four”, duke u renditur e para falë golavarazhit në ndeshjet direkte me Elbasanin, pasi kishin të njëjtin numër pikësh.
Rrogozhinasit kanë fituar 2-0 ndeshjen e fundit, duke vulosur kështu ecurinë e tyre të suksesshme në mini-turne. Me këtë fitore, ata kanë siguruar vendin e parë, pozitë të cilën ia kanë marrë rivalëve që në ndeshjen e kaluar.
Dy golat e Albanezes në pjesën e parë vendosën rezultatin e kësaj sfide, e luajtur në “Elbasan Arena”, duke i siguruar titullin ekipit të drejtuar nga Nevil Dede.
EGNATIA-DINAMO 2-0
- 29′, 39′ Albaneze
NGJARJET KRYESORE
- 90’+4’ Mbyllet ndeshja me fitoren 2-0 të Egnatias.
- 90’+1’ Bakajoko i lë vendin në fushë Buriçit në radhët e Egnatias.
- 90’ Jepen 4 minuta shtesë.
- 81’ Xheferson merr vendin e Haimes në radhët e Egnatias.
- 80’ Mustafa gjuan nga jashtë zone, sfera ndalet nga Tandilashvili.
- 76’ Edhe Poçi ndëshkohet me karton të verdhë.
- 72’ Kryeziu dhe më pas Haime ndëshkohen me të verdhë brenda pak sekondash për ndërhyrje të parregullta.
- 70’ Vila dhe Malomo i lënë vendin Metës dhe Metajt në radhët e Dinamos. Ndërkohë, Adjesa dhe Ruçi hyjnë në fushë në vend të Albanezes dhe Grudës në radhët e Egnatias.
- 67’ Xhejms merr vendin e Nani në radhët e Dinamos.
- 63’ Xhemajli ndëshkohet me karton të verdhë për faull ndaj Koma.
- 62’ Gruda ka mundësinë të gjuajë në portë, por Manjani e ndal në mënyrë perfekte.
- 60’ Berisha dhe Guindo lënë fushën e lojës për t’i bërë vend Farrukut dhe Koma në radhët e Dinamos.
- 59’ Albaneze gjuan me të majtën nga jashtë zone, sfera shkon në duart e Teqjes.
- 58’ Momente të rrezikshme para portës së Dinamos pas një goditje nga këndi; gjuajtja e Fangajt shkon jashtë.
- 54’ Gruda shpërthen në të majtë, pasimi i tij në qendër nuk arrihet nga Bakajoko.
- 51’ Bakajoko ndëshkohet me të verdhë.
- 46’ Pjesa e dytë nis me Fangajn në vend të Alijevit në radhët e Egnatias.
- 45’+3’ Mbyllet pjesa e parë me avantazhin 2-0 të Egnatias.
- 45’ Jepen 3 minuta shtesë.
- 44’ Pas një goditje nga këndi, Mustafa gjuan me kokë, por nuk ka forcë të shqetësojë Tandilashvilin.
- 39’ GOOOL EGNATIA! Gafë e pabesueshme e Malomos, i cili i jep asist të pastër Albanezes, i cili nuk gabon dhe dyfishon shifrat.
- 36’ Pretendime për penallti të bluve, pas një kontakti mes Sotës dhe Berishës në zonë. Gjyqtari bën shenjë që loja të vazhdojë.
- 33’ Bakajoko kontrollon mirë topin dhe nxjerr të lirë Haime në të djathtë. Gjuajtja e këtij të fundit devijohet nga Teqja, e më pas Ismaili çon sferën në goditje këndi.
- 31’ Alijev ndëshkohet me karton të verdhë.
- 29’ GOOOL EGNATIA! Shënon Albaneze me penallti.
- 28’ Penallti për Egnatian! Ismaili godet Bakajokon në zonë, duke i humbur ekuilibrin dhe për gjyqtarin nuk ka dyshime.
- 24’ Bakajoko hyn në zonë, gjuan dhe mposht Teqjen, por Ismaili në vijën fatale largon sferën.
- 22’ Nani ndëshkohet me karton të verdhë për një faull ndaj Xhemajlit.
- 21’ Albaneze shfaqet para Teqjes, por gjuajtja e tij devijohet nga portieri. Vijërojtësi sinjalizon për pozicion jashtë loje.
- 19’ Manjani fiton një duel me Bakajokon dhe ia del të largojë topin në goditje këndi para se sulmuesi të shfaqej para portës.
- 18’ Fernando harkon një goditje dënimi në zonë, mbrojtja e Dinamos largon sferën.
- 12’ Berisha përsëri nga e majta shmang Sotën e pason për Guindo, i cili nuk ia del të gjuajë në portë.
- 6’ Në goditjen nga këndi, Bakajoko shkakton faull në sulm për ndërhyrje të gabuar ndaj Guindo.
- 5’ Një top i gjatë për Bakajokon nuk kontrollohet nga sulmuesi, me sferën që shkon në fundore, por gjyqtari akordon goditje nga këndi.
- 2’ B. Berisha del në të majtë në sulm, pason për Guindo, i cili nuk kontrollon si duhet dhe del jashtë me topin.
- 1’ Nis dueli në “Elbasan Arena”.
FORMACIONET ZYRTARE
EGNATIA: Tandilashvili, Alijev, Xhemajli, Poçi, Haime, Sota, Kryeziu, Albaneze, Fernando, Gruda, Bakajoko. Trajner: Nevil Dede
DINAMO: Teqja, Ismaili, Aliji, Manjani, Nani, Qefalija, Vila, B. Berisha, Malomo, Mustafa, Guindo. Trajner: Ilir Daja
PANORAMASPORT.AL
“`