Lufta dëmton rëndë ekonominë e Iranit, FMN paralajmëron për përkeqësim të situatës
Ekonomia e Iranit ka pësuar një goditje të konsiderueshme gjatë muajve të luftës. Prodhimtaria e Brendshme Bruto (PBB) u tkurr me 10.1% në tremujorin e parë të vitit kalendarik pers, krahasuar me të njëjtën periudhë të vitit të kaluar. Këto të dhëna zyrtare, të publikuara të dielën, përfshijnë edhe sektorin e naftës, i cili është një nga shtyllat kryesore të ekonomisë iraniane.
Tkurrja e ndjeshme ekonomike përkon me periudhën kur Irani u përfshi në luftime, të shoqëruara me sulme dhe kundërsulme për rreth 40 ditë, përpara vendosjes së armëpushimit në prill. Pavarësisht një marrëveshjeje në parim mes Teheranit dhe Uashingtonit në mes të qershorit, armiqësitë rifilluan, me të dyja palët që akuzuan njëra-tjetrën për shkelje të kushteve.
Një nga çështjet më kritike për ekonominë iraniane mbetet Ngushtica e Hormuzit, një rrugë detare strategjike përmes së cilës para luftës kalonte rreth 20% e naftës së konsumuar në botë. Çdo ndërprerje e qarkullimit në këtë zonë mund të ketë pasoja të drejtpërdrejta për eksportet iraniane dhe furnizimin global me naftë.
Në të njëjtën kohë, Shtetet e Bashkuara kanë rivendosur bllokadën ndaj porteve iraniane në Gjirin Persik, duke vështirësuar më tej eksportin e naftës bruto. Gjatë bllokadës së mëparshme, nga prilli deri në qershor, Irani nuk arriti të eksportonte naftë, sipas deklaratave të kryetarit të parlamentit iranian, Mohammad Bagher Ghalibaf.
Presionet ekonomike janë shtuar edhe nga inflacioni i lartë dhe zhvlerësimi i vazhdueshëm i rialit. Sanksionet ndërkombëtare kanë rënduar prej vitesh mbi ekonominë iraniane, ndërsa konflikti i fundit ka përkeqësuar më tej situatën. Në gusht, inflacioni zyrtar në Iran arriti në 69.9% në bazë vjetore. Rritja e çmimeve të mallrave bazë, veçanërisht e ushqimeve, ka dëmtuar fuqinë blerëse të familjeve.
Ndërkohë, riali ka vijuar të humbasë vlerë ndaj dollarit. Në tregun e zi, të dielën një dollar këmbehej me rreth 2.3 milionë rialë. Fondi Monetar Ndërkombëtar parashikon që ekonomia iraniane të tkurret me 5.4% në total gjatë këtij viti, në një kohë kur lufta, sanksionet dhe problemet me eksportet e naftës vazhdojnë të rëndojnë perspektivën ekonomike të vendit.