Presidenti turk sulmon Netanyahun gjatë mesazhit të Kurban Bajramit
Presidenti turk, Recep Tayyip Erdoğan, ka drejtuar kritika të forta kundrejt kryeministrit izraelit, Benjamin Netanyahu, në një mesazh të mbajtur me rastin e Festës së Sakrificës (Kurban Bajramit) pranë Xhamisë së Madhe Çamlıca në Stamboll.
Gjatë fjalës së tij, Presidenti Erdoğan foli për situatën në Gaza dhe Palestinë, duke nënvizuar rëndësinë e unitetit dhe solidaritetit mes vendeve myslimane.
“Zoti na dhëntë mundësinë të arrijmë edhe shumë festa të tjera me shëndet, begati dhe gëzim. Uniteti dhe kohezioni ynë qoftë i përjetshëm,” tha ai, duke uruar besimtarët për festën.
Megjithatë, në deklaratat për gazetarët, Presidenti turk ndryshoi tonin, duke e cilësuar situatën në Gaza si një “provë të madhe” për botën myslimane.
“Ky tiran i quajtur Netanyahu do të marrë mësimin që meriton për atë që po ndodh në Palestinë dhe Gaza,” deklaroi Erdoğan. Ai gjithashtu shprehu pritshmërinë për një reagim më të gjerë ndërkombëtar ndaj zhvillimeve në rajon.
Ai theksoi më tej se festa duhet të shërbejë si një moment bashkimi dhe forcimi i solidaritetit mes vendeve myslimane.