Franca ka njoftuar një paketë ndihme prej 1.5 miliardë eurosh për Republikën Demokratike të Kongos (RDK).
Kjo ndihmë, e cila synon të mbështesë civilët, u bë e ditur nga pjesëmarrësit në një konferencë të organizuar për zgjidhjen e konfliktit me Ruandën. Presidenti francez Emmanuel Macron e bëri publike këtë njoftim gjatë fjalës së tij në ceremoninë e mbylljes së eventit.
“Së bashku, ju keni mbledhur më shumë se 1.5 miliardë euro ndihmë për popullatat më vulnerabël”, theksoi Macron.
Ai gjithashtu vuri në dukje se plani ekzistues i OKB-së për ofrimin e 2.5 miliardë dollarëve ndihmë humanitare për RDK-në aktualisht është financuar vetëm 16%. Për këtë arsye, ai bëri thirrje që “financimi të përshtatet me natyrën e situatës”.
Presidenti francez njoftoi gjithashtu rifillimin e operacioneve në aeroportin e Gomës, duke shtuar se ai do të fillojë të pranojë fluturime humanitare në javët e ardhshme.
Konferenca, e organizuar në bashkëpunim nga Franca dhe Togo, iu dedikua çështjeve të ruajtjes së paqes dhe ofrimit të mbështetjes humanitare për popullsinë e rajonit të Liqeneve të Mëdha.
Përveç Presidentit Macron, në konferencë morën pjesë Presidenti i RDK-së, Felix Tshisekedi, dhe Kryeministri i Togos, Faure Gnassingbé. Kryeministri Gnassingbé po ndërmjetëson konfliktin midis RDK-së dhe Ruandës në emër të Bashkimit Afrikan, dhe në event morën pjesë gjithashtu përfaqësues të organizatave joqeveritare rajonale.