Paradoksi i turizmit: Fshati i UNESCO-s me vetëm 17 banorë kërkon më pak vizitorë
Fshati i vogël sllovak Vlkolínec, i përfshirë në Listën e Trashëgimisë Botërore të UNESCO-s në vitin 1993, është përballur me një problem të papritur: disa vendas besojnë se popullariteti i fshatit është bërë tepër i lartë.
Çdo vit, fshati, i cili ka vetëm 17 banorë të përhershëm, vizitohet nga rreth 100,000 turistë. Sipas banorëve, ky fluks i madh vizitorësh i privon ata nga qetësia dhe privatësia.
Një nga banorët më të vjetër të fshatit, 68-vjeçari Anton Zabukha, u shpreh se u detyrua të vendoste tabela në shtëpinë e tij me mbishkrimet “Pronë private”, “Ndalohet hyrja pa leje” dhe “Ndalohet fotografimi” për të dekurajuar turistët kureshtarë. Sipas tij, shumë aktivitete të organizuara për vizitorët nuk pasqyrojnë më traditat e vërteta të Vlkolínecit, dhe vetë fshati po shndërrohet gradualisht në një “dekor turistik”.
Jo të gjithë banorët e mbështesin idenë e braktisjes së statusit të një Vendi të Trashëgësisë Botërore, por shumica pranojnë se infrastruktura ekzistuese nuk është projektuar për një fluks kaq të madh njerëzish. Ndër problemet kryesore përmenden rruga e ngushtë e aksesit, mungesa e vendeve të parkimit dhe tualeteve publike. Sipas banorëve vendas, turistët ndonjëherë përdorin oborret private për shkak të mungesës së banjove.
Autoritetet, nga ana tjetër, nuk e mbështesin propozimin për përjashtimin e fshatit nga lista e UNESCO-s. Ato deklarojnë se po punojnë për të zvogëluar ngarkesën në vendbanim. Planet përfshijnë ndërtimin e tualeteve të reja publike, krijimin e një parkingu në hyrje të fshatit, si dhe restaurimin e kishës dhe shkollës lokale.
Tani, çdo banor i përhershëm i Vlkolínecit merr afërsisht 400 euro kompensim vjetor për shqetësimet që lidhen me fluksin turistik dhe gjithashtu mund të aplikojë për fonde shtesë për rinovimin e shtëpisë së tyre.
Disa turistë pranojnë gjithashtu se e kuptojnë pakënaqësinë e vendasve. Sipas mendimit të tyre, një turizëm kaq masiv mund ta prishë vërtet jetën normale të një komuniteti të vogël rural.