“`html
Huatë me probleme rikthehen në ulje në qershor, arrijnë nivelet më të ulëta që nga viti 2007
Raporti i kredive me probleme është kthyer në rënie gjatë muajit qershor, pasi kishte shënuar një rritje të lehtë në maj. Sipas statistikave të publikuara nga Banka e Shqipërisë, kreditë e pakthyera në afat nga bankat përbënin 3.7% të totalit të huadhënies në vend.
Një muaj më parë, ky tregues ishte rritur në 3.77%. Niveli aktual është më i ulëti i regjistruar që nga viti 2007, i cili u mbyll me një tregues prej 3.3%. Pas asaj periudhe, huatë e pakthyera në afat nga bankat u rritën me shpejtësi, duke arritur kulmin në vitin 2014, ku një e katërta e kredisë ishte me më shumë se 3 muaj vonesë.
Më pas, Banka e Shqipërisë nisi një plan për ristrukturimin e huave jo performuese, i cili në një masë të konsiderueshme konsistoi në fashitjen e tyre nga bilanci.
Krahasuar me të njëjtën periudhë të një viti më parë, huatë me probleme kanë shënuar një rënie prej 0.31 pikë përqindje. Aktualisht, raporti i kredive me probleme duket se po vijon të ruajë nivele të ulëta, pavarësisht shqetësimeve të lidhura me rritjen e shpejtë të kreditimit në vitet e fundit. Ecuria e mirë makroekonomike dhe zgjerimi i vazhdueshëm i portofolit të kredisë po ndikojnë pozitivisht në ecurinë e treguesit të kredive në vonesë.
Kriza në Lindjen e Mesme dhe rritja e çmimeve të karburanteve kanë sjellë disa rreziqe të reja në perspektivë. Megjithatë, duket se përmasat e ndikimit të kësaj krize do të jenë më të kufizuara sesa mund të mendohej në periudhën e parë të shpërthimit të saj.
Të dhëna të tjera nga Banka e Shqipërisë tregojnë se individët janë më korrektët në banka. Në fund të vitit 2025, raporti i kredive me probleme në portofolin e klientëve individë ishte në nivelin 2.6%, duke shënuar një rënie të mëtejshme nga niveli prej 2.9% i një viti më parë.
Klientët biznes vazhdojnë të kenë nivele më të larta të kredive me probleme, por gjatë vitit të kaluar përmirësimi në këtë segment ishte më i ndjeshëm. Raporti i kredive me probleme për bizneset zbriti në 4.7%, nga 5.2% që kishte qenë një vit më parë.
Segmenti i individëve ka pasur historikisht një raport të kredive me probleme më të ulët krahasuar me bizneset, për shkak të ekspozimeve më të vogla dhe rrezikut më të shpërndarë të kredisë. Gjithashtu, duke qenë se pjesa më e madhe e portofolit konsiston në kredi për blerjen e banesave, angazhimi i huamarrësve ndaj shlyerjes së detyrimeve në përgjithësi është i madh.
“`