“`html
“Veproi si ujk i vetmuar” / U paraqit i armatosur në darkën ku ndodhej Trump! Çfarë dihet deri tani për agresorin 31-vjeçar
I dyshuari që hyri me forcë në një pikë kontrolli sigurie dhe qëlloi një agjent të Shërbimit Sekret gjatë Darkës së Korrespondentëve të Shtëpisë së Bardhë në Uashington DC, ishte i armatosur me disa armë dhe thika, njoftoi policia.
Donald Trump, bashkë me zonjën e parë Melania dhe zyrtarë të lartë, u evakuuan shpejt në një vend të sigurt nga eventi vjetor, pasi u dëgjuan disa të shtëna me armë zjarri jashtë sallës së vallëzimit të hotelit Washington Hilton, ku ishin të pranishëm rreth 2,500 persona.
I dyshuari është identifikuar nga autoritetet amerikane si Cole Thomas Allen, 31 vjeç, nga Torrance, Kaliforni. Zyrtarët thanë se ai nuk ka të kaluar kriminale dhe nuk ishte në vëzhgim nga forcat e rendit.
Policia raportoi se i dyshuari ishte i armatosur me një pushkë gjahu, një pistoletë dhe disa thika. Gjatë shkëmbimit të zjarrit me një oficer, ky i fundit u godit, por nuk pësoi lëndime pasi mbante veshur një jelek antiplumb.
Sipas zëdhënësit të policisë, Carroll, i dyshuari u “përmbys” dhe u prangos nga forcat e rendit para se të kapeshin.
Zyrtarët besojnë se i dyshuari ka vepruar i vetëm, por motivi i tij mbetet i paqartë. Duke folur në një konferencë për shtyp pas incidentit, Presidenti Trump u shpreh se personi i armatosur mund të ketë pasur si objektiv pikërisht atë.
Më herët, Trump ngarkoi një foto në platformën e tij Truth Social, ku pretendoi se tregonte personin e dyshuar të armatosur duke u kapur. Ai e përshkroi të dyshuarin si një “ujk të vetmuar” nga Kalifornia.
“`