“`html
Energjia: Balluku njofton 2 miliardë euro investime private në burime të rinovueshme
Investimet private në burimet e rinovueshme të energjisë kanë arritur rreth 2 miliardë euro gjatë viteve të fundit. Këtë shifër e bëri të ditur zëvendëskryeministrja dhe Ministre e Infrastrukturës dhe Energjisë, Belinda Balluku, këtë të hënë gjatë një aktiviteti kushtuar projektit të parë eolik që do të zbatohet në zonën e Tropojës.
Projekti, i kompanisë CWP, parashikon një park me kapacitet të instaluar prej 600 MW. Balluku e cilësoi këtë si një fazë të re për sektorin energjetik shqiptar dhe vazhdim i rrugëtimit drejt diversifikimit të nisur vite më parë.
“Parku eolik i Tropojës nuk është thjesht një investim energjetik, por simbol i transformimit që po përjeton Shqipëria, i një ekonomie më të qëndrueshme dhe më të hapur ndaj inovacionit,” deklaroi ajo.
Sipas Ministres, sektori energjetik shqiptar po hyn në një fazë të re, ku Shqipëria po kalon nga varësia nga hidroenergjia drejt një modeli modern dhe të balancuar energjetik. Diversifikimi i burimeve nuk është më një zgjedhje, por një domosdoshmëri strategjike. Ky proces ka filluar që në vitin 2018, me krijimin e burimeve alternative si energjia diellore dhe më pas ajo eolike.
“Ky tranzicion është realitet që po merr formë. Investimet e huaja direkte janë treguesi më i lartë i stabilitetit ekonomik,” shtoi Balluku.
Ajo theksoi se vetëm kohët e fundit, mbi 1.5 miliardë euro investime private janë angazhuar ose janë në proces, kryesisht në burime të rinovueshme si diellore dhe eolike, me pak ndikim mjedisor. Në përgjithësi, në sektorin energjetik shqiptar janë angazhuar mbi 2 miliardë euro investime, duke rezultuar në mbi 700 MW kapacitete të reja private fotovoltaike në operim dhe 400 MW kapacitete të shtuara vetëprodhuese. Gjithashtu, ekziston një portofol i ardhshëm që pritet të çojë në 1500 MW kapacitete fotovoltaike dhe eolike. Për më tepër, janë mbi 1600 MW të reja depozituese në fazë studimi dhe lehtësimi financiar.
“Në energjinë e erës, për herë të parë po hyjmë në ndërtimin konkret me parkun e CWP Tropojë,” përfundoi Balluku.
Kryeministri Edi Rama vuri theksin te rëndësia e projekteve të kësaj shkalle, duke shprehur dëshirën që ky park energjie e erës në Tropojë të hyjë në rrjetin e prodhuesve të energjisë së rinovueshme brenda 12 muajsh.
Sipas Ramës, ky projekt sjell jo vetëm një burim të ri energjie, por edhe njohuri. Ai theksoi se ky investim, ashtu si të tjerët, shkon në drejtimin strategjik për ta bërë Shqipërinë një vend sovran në prodhimin e energjisë.
“Koha kur Shqipëria duhet të dalë drejt tregut për të blerë energji po shkon drejt fundit, dhe ne do jemi mes atyre pak vendeve që gëzojnë pavarësi të plotë për prodhimin e energjisë,” deklaroi Rama.
“`