Irani lëshon ultimatum të ri për Ngushticën e Hormuzit: Anijet nga vendet që zbatojnë sanksionet e SHBA-së nuk do të lejohen të kalojnë.
Irani ka nxjerrë një paralajmërim të ri në lidhje me lëvizjen e anijeve në Ngushticën e Hormuzit.
Sipas mediave iraniane, zëdhënësi ushtarak Mohammad Akramian ka deklaruar se anijet që vijnë nga vende që zbatojnë sanksionet e SHBA-së kundër Teheranit nuk do të lejohen të kalojnë këtë ngushticë.
Ngushtica e Hormuzit është një nga korridoret më strategjike detare në botë, përmes së cilës transportohet një pjesë e konsiderueshme e furnizimeve globale me naftë dhe gaz. Për këtë arsye, çdo përshkallëzim i tensioneve në këtë zonë pritet me shqetësim nga tregjet ndërkombëtare dhe fuqitë e mëdha.
Ky paralajmërim vjen në një kohë kur Shtetet e Bashkuara po presin përgjigjen e Teheranit ndaj nismës së tyre diplomatike për uljen e tensioneve dhe ndalimin e luftimeve në rajon.