Izraeli propozon riemërtimin e luftës në Gaza si “Lufta e Rilindjes”

Izraeli propozon riemërtimin e operacioneve në Gaza si “Lufta e Rilindjes”

Këshilli i Ministrave i Izraelit do të votojë të dielën për riemërtimin zyrtar të luftës kundër Hamasit në Rripin e Gazës si “Lufta e Rilindjes”. Ky propozim, i paraqitur nga kryeministri Benjamin Netanyahu dhe ministri i Mbrojtjes, Israel Katz, synon të zëvendësojë emërtimin aktual “Shpatat prej Hekuri”. Ky i fundit iu dha operacionit ushtarak të nisur më 7 tetor 2023, pas sulmit të Hamasit në veri të Izraelit dhe masakrave ndaj qindra civilëve.

Netanyahu kishte propozuar për herë të parë emrin “Lufta e Rilindjes” një vit më parë, gjatë një mbledhjeje të qeverisë me rastin e përvjetorit të parë të konfliktit. Ai atëherë deklaroi: “Kjo është lufta për ekzistencën tonë, ‘Lufta e Rilindjes’.”

Megjithëse ky mund të jetë emërtimi zyrtar, shumë izraelitë i referohen ende konfliktit si “lufta e 7 tetorit”.