Kontroll i befasishëm në burgun e VIP-ave në Durrës, gjenden tre telefona
Policia ka zhvilluar një kontroll të befasishëm në ambientet e brendshme dhe të jashtme të burgut të Durrësit, ku janë gjetur dhe sekuestruar tre celularë.
Njoftimi i policisë sqaron se, në vijim të informacioneve të siguruara nga strukturat operative të IEVP Durrës dhe pas analizës së riskut, Drejtoria e Përgjithshme e Burgjeve ka ndërmarrë një aksion kontrolli në këtë institucion.
Kontrolli u zhvillua në orët e para të mëngjesit, në zbatim të Urdhrit Nr. 626, datë 07.04.2026, me pjesëmarrjen e Forcave Speciale të DPB. Gjatë operacionit u ushtrua kontroll në ambientet e brendshme dhe të jashtme të institucionit.
Rezultatet e kontrollit:
- U sekuestruan tre celularë tip “iPhone”, të ndezur dhe funksionalë.
- Njëri prej tyre u gjet në posedim të të paraburgosurit me iniciale B.G.
- Dy të tjerë, së bashku me një palë kufje “bluetooth”, u konstatuan pa autorë në ambientet e institucionit.
Veprimet e menjëhershme:
- U veçua i paraburgosuri B.G.
- U hartua raporti i incidentit.
- U mbajt procesverbali i bllokimit të sendeve të ndaluara.
- Materialet iu referuan Specialistit të SHKB për veprime të mëtejshme hetimore.
Ky aksion është një tjetër dëshmi e vendosmërisë për të goditur çdo tentativë për cenimin e sigurisë në institucionet penitenciare. Kontrollet do të vijojnë me intensitet të lartë në të gjitha IEVP-të në rang vendi. Ekziston zero tolerancë ndaj shkelësve.