Përshkallëzohet kriza në Lindjen e Mesme: Irani godet cisterna nafte dhe baza amerikane, rriten çmimet e karburanteve
Tensionet në Lindjen e Mesme janë përshkallëzuar sërish, pasi Korpusi i Gardës Revolucionare Islamike të Iranit ka njoftuar se ka sulmuar tre cisterna nafte në Ngushticën e Hormuzit dhe ka lëshuar raketa balistike ndaj objektivave ushtarake amerikane në Jordani.
Sipas autoriteteve amerikane, të gjitha raketat u interceptuan me sukses nga sistemet e mbrojtjes ajrore. Si kundërpërgjigje, Shtetet e Bashkuara dhe Arabia Saudite zhvilluan sulme ajrore të përbashkëta kundër milicive pro-iraniane në Irak.
Përshkallëzimi i konfliktit ka shkaktuar reagime të menjëhershme në tregjet ndërkombëtare të energjisë, duke nxitur një rritje të fortë të çmimeve të naftës. Në tregtinë aziatike, nafta amerikane WTI u rrit me 4.11%, duke arritur në 82.52 dollarë për fuçi, ndërsa nafta Brent u ngjit me 4.27%, në 87.68 dollarë për fuçi.
Këto rritje rikuperuan një pjesë të humbjeve të ditëve të fundit, të shkaktuara nga zbutja e përkohshme e tensioneve në rajon. Tregjet reaguan jo vetëm ndaj sulmit me raketa të Iranit kundër forcave amerikane, por edhe ndaj raportimeve për incidente në Detin e Kuq.
Qendra e Operacioneve Tregtare Detare e Mbretërisë së Bashkuar bëri të ditur se një cisternë nafte raportoi një shpërthim gjatë kalimit në pjesën jugore të rajonit, duke shtuar shqetësimet për sigurinë e një prej korridoreve më të rëndësishme të transportit të energjisë në botë.
Analistët paralajmërojnë se çdo përshkallëzim i mëtejshëm në Ngushticën e Hormuzit, përmes së cilës kalon një pjesë e konsiderueshme e furnizimit global me naftë, mund të sjellë luhatje edhe më të forta në tregjet ndërkombëtare dhe të ushtrojë presion mbi ekonominë globale.