Studimi: Lufta në Lindjen e Mesme rrit çmimin e fluturimeve të gjata nga Evropa me mbi 100 dollarë
Një analizë e organizatës Transport & Environment (T&E) tregon se përshkallëzimi i konfliktit në Lindjen e Mesme dhe ndërprerjet në furnizimet globale me naftë kanë rritur ndjeshëm kostot e fluturimeve ajrore që nisen nga Evropa.
Sipas studimit, rritja e çmimit të karburantit për avionë ka shtuar mesatarisht rreth 88 euro (rreth 104 dollarë) koston për pasagjer në fluturimet e gjata. Për fluturimet brenda Evropës, rritja është rreth 29 euro për pasagjer.
Raporti paralajmëron se linjat ajrore evropiane po përballen me një sezon të vështirë pranverë-verë, pasi çmimi i karburantit për avionë ka kaluar mbi 100 dollarë për fuçi që nga fillimi i krizës. Kjo ngre shqetësime edhe për mundësi anulimesh fluturimesh në rast mungesash furnizimi.
Në këtë situatë, Bashkimi Evropian pritet të dalë me udhëzime të reja për menaxhimin e furnizimeve të kufizuara të karburantit për aviacionin.