Lukaku shpreh pakënaqësi në rrjetet sociale: “Nuk po kënaqem”
“Unë nuk po injoroj asgjë. Thjesht nuk po kënaqem.” Këto komente, të publikuara dhe shpërndara nga Romelu Lukaku në “Instagram Stories”, sugjerojnë një periudhë jo të mirë te Napoli.
Sulmuesi belg ka pasur vetëm shtatë paraqitje këtë sezon, duke shënuar vetëm një gol. Ai u pengua fillimisht nga një problem muskulor në gusht. Pas rikthimit në dispozicion të trajnerit Kontes në janar, ai luajti vetëm gjashtë minuta kundër Torinos më 6 mars dhe nuk është parë më në fushë.
Kjo situatë lidhet edhe me një dëmtim tjetër, dhe që prej pushimit të kombëtareve në mars, ai ka qëndruar në Belgjikë për të vazhduar rikuperimin, në vend që të kthehej në Itali. Ky vendim nuk është pritur mirë nga klubi dhe mund të çojë drejt një largimi të mundshëm në merkaton e ardhshme.
Lukaku ka dhënë gjithashtu një mesazh rreth gjendjes së tij emocionale, duke u shprehur: “Momentet e vështira vijnë e shkojnë, dhe disa sezone zgjasin më shumë se të tjerat. Qëndro i fortë, mos u dorëzo.”