“`html
Makinat elektrike, draftligji hap tregun e pikave të karikimit, rastet kur mund të hyjë edhe OSSH
Rritja e përdorimit të mjeteve elektrike, megjithëse përqindja e tyre mbetet modeste krahasuar me totalin, duket se po shtyn përfshirjen e më gjerë të aspekteve ligjore që lidhen me to.
Në draftligjin “Për sektorin e energjisë elektrike” parashikohet një nen i veçantë që fokusohet te zhvillimi dhe operimi i pikave të karikimit për mjetet elektrike.
Sipas Nenit 80 të draftligjit, “Integrimi i elektromobilitetit në rrjetin elektrik”, institucionet do të përcaktojnë një kuadër rregullator që synon të nxisë konkurrencën dhe të shmangë përqendrimin e aktivitetit tek kompania publike.
Pika 1 e këtij neni sqaron se “ministri, me propozimin e OSSH-së, miraton dhe publikon rregulloret e detajuara për të lehtësuar lidhjen e pikave të karikimit publike dhe private në rrjetin e shpërndarjes së energjisë elektrike.” Këto rregullore gjithashtu “sigurojnë bashkëpunimin mbi baza jodiskriminuese të Operatorit të Sistemit të Shpërndarjes, me çdo shoqëri që zotëron, zhvillon, operon ose menaxhon pika rikarikimi për automjetet elektrike, përfshirë edhe lidhjen në rrjet.”
Drafti thekson gjithashtu se Operatori i Sistemit të Shpërndarjes (OSSH) nuk do të zotërojë, zhvillojë, menaxhojë ose operojë pika rikarikimi, përveçse në rastet kur operatori i sistemit të shpërndarjes ka në pronësi pika private rikarikimi për përdorim vetjak.
Megjithatë, edhe në këtë rast, është bërë një përjashtim. Pika 3 përcakton se OSSH mund të hyjë në treg në përputhje me parimin e kostos më të ulët të mundshme për një pikë rikarikimi, por duhet të plotësohen disa kushte.
Referuar draftit, çdo procedurë e tillë duhet të jetë e hapur, transparente dhe jodiskriminuese dhe t’i nënshtrohet miratimit paraprak nga Enti Rregullator i Energjisë (ERE). ERE duhet të verifikojë kushtet e tenderimit para se operatori i shpërndarjes të ndërhyjë në treg.
Po kështu, OSSH duhet të operojë pikat e karikimit mbi bazën e të drejtës së aksesit të palëve të treta dhe nuk bën diskriminim midis përdoruesve të sistemit ose kategorive të tyre, veçanërisht në favor të shoqërive të lidhura me të.
Rregullat e detajuara për procedurat që do të ndjekë ERE pritet të hartohen dhe miratohen nga vetë ky institucion.
Shifrat zyrtare nga Drejtoria e Përgjithshme e Shërbimit të Transportit Rrugor tregojnë se deri në fund të 2025-ës ishin rreth 12 mijë mjete elektrike të regjistruara. Ndërkohë, në janar-mars 2026, numri arriti në 2964, duke u dyfishuar krahasuar me të njëjtën periudhë të vitit të kaluar.
Ky interes i shtuar për mjetet elektrike po vijon prej kohësh, por rrjeti i pikave të karikimit ende mbetet i kufizuar në vend. Ato janë më të përqendruara në Tiranë e Durrës dhe ka një tendencë drejt zonave të bregdetit, nxitur nga turizmi. Megjithatë, ato mbeten të pa aksesueshme në shumë rajone të tjera.
“`