Mazhoranca rrëzon kërkesën e PD për interpelancë lidhur me AKSHI-n
Me votat e mazhorancës, u rrëzua kërkesa e Partisë Demokratike për të zhvilluar një interpelancë me kryeministrin Edi Rama, e cila kishte si temë abuzimet me tenderët e Agjencisë Kombëtare të Shërbimeve të Kujdesit Shëndetësor (AKSHI).
Kryeparlamentari Niko Peleshi sqaroi se interpelanca nuk mund të zhvillohet për çështje që janë nën hetim penal, pasi kjo do të përbënte ndërhyrje në punën e drejtësisë.
Në përgjigjen e kthyer nga Kuvendi drejtuar Partisë Demokratike, thuhet se:
- Interpelanca, si instrument kushtetues i kontrollit parlamentar, nuk mund të përdoret për të kërkuar shpjegime nga anëtarët e Këshillit të Ministrave mbi çështje që janë nën hetim penal. Kjo për arsye se ata nuk kanë kompetencën për t’u shprehur për këto çështje, dhe çdo ndërhyrje apo komentim do të ishte në kundërshtim me parimin e ndarjes dhe balancimit të pushteteve.
- Përmbajtja e kërkesës përbën një përpjekje për të transferuar në sallën e Kuvendit një debat që i përket ekskluzivisht juridiksionit të organeve të drejtësisë. Kjo synon krijimin e një “gjykate politike” mbi bazën e informacioneve të paadministruara në mënyrë përfundimtare nga autoritetet gjyqësore. Një qëndrim i tillë bie ndesh me standardet kushtetuese të shtetit të së drejtës dhe me rolin e Kuvendit si organ ligjvënës, e jo si organ hetimor apo gjykues.
- Pyetjet e drejtuara në kërkesë presupozojnë ekzistencën e dijenisë së Kryeministrit mbi elementë të detajuar të një hetimi penal, çka nuk gjen mbështetje në asnjë normë ligjore. Kryeministri nuk ka detyrimin ligjor të ketë dijeni mbi përmbajtjen e dosjeve hetimore, as nuk mund të kërkohet prej tij të komentojë mbi to, për aq kohë sa këto çështje janë nën juridiksionin e organeve të drejtësisë.
- Referimi i vazhdueshëm në raportime mediatike nuk përbën një bazë të mjaftueshme për realizimin e interpelancës si formë kontrolli parlamentar, sidomos në rastet kur çështja është në proces hetimi dhe nuk ka një konstatim përfundimtar nga organet kompetente.
- Vetë natyra e çështjes së ngritur, e lidhur me hetime për vepra të rënda penale, përfshirë korrupsionin dhe krimin e organizuar, kërkon një trajtim në kuadër të procedurave penale dhe jo një debat politik paralel, i cili mund të cenojë hetimin e çështjes dhe të ndikojë në perceptimin publik mbi procesin e drejtësisë.