“Kemi gjetur ekuilibrin”
Kancelari gjerman Friedrich Merz ka dërguar një mesazh për Ballkanin Perëndimor, duke paralajmëruar se humbja e besueshmërisë do të thotë humbje të këtyre vendeve. Ai gjithashtu ka dhënë një paralajmërim të fortë për partinë AfD.
Pavarësisht rezultateve të dobëta në sondazhe, Friedrich Merz beson se koalicioni qeverisës ka “gjetur ekuilibrin”. Para pushimeve verore, ai ka paralajmëruar kundër votimit për AfD-në dhe ka prezantuar një vizion për Ballkanin Perëndimor.
Konferenca vjetore për shtyp e mbajtur nga kancelari gjerman gjatë verës është një nga angazhimet e fundit para se ai t’i drejtohet pushimeve. Pavarësisht rezultateve të dobëta në sondazhet e opinionit publik, të cilat tregojnë një mbështetje mes 13 dhe 20 për qind për punën e tij dhe të qeverisë së tij, të përbërë nga Kristian Demokratët (CDU/CSU) dhe Social Demokratët (SPD), Merz shprehet i kënaqur me ecurinë.
“Koalicioni ka gjetur ekuilibrin e vet”, deklaroi Merz, duke shtuar se rezultatet janë pozitive dhe se qeveria federale ka gjetur ritmin, duke përmbushur pritjet pavarësisht disa kritikave.
Concretisht, Merz i referohet reformave lidhur me pensionet, kujdesin shëndetësor dhe taksat. Ai vlerëson reformën e planifikuar të pensioneve, e cila përfshin për herë të parë një komponent të vogël të investimeve kapitale. “Duhet ta kishim bërë këtë 30 vjet më parë, ashtu si suedezët, danezët, holandezët dhe shumë të tjerë në mbarë botën që e bënë shumë kohë më parë. Por tani të paktën po fillojmë,” tha ai.
Megjithatë, shumë gazetarë u fokusuan rreth Alternativës për Gjermaninë (AfD), një parti e ekstremit të djathtë, e cila kryeson në sondazhe për zgjedhjet e shtatorit në dy shtete të Gjermanisë lindore. Si synon Merz të parandalojë që e djathta ekstreme të qeverisë Gjermaninë për herë të parë?
Merz fillimisht e anashkaloi pyetjen, por më pas, drejtpërdrejt, u drejtua votuesve në Saksoni-Anhalt dhe Mecklenburg-Vorpommern: “Shikoni me kujdes. Mos u mbështetni vetëm në aktivitetin në mediat sociale – kudo që të ndodhë. Në vend të kësaj, shikoni se çfarë po përpiqet të bëjë qeveria federale.”
Ai theksoi se, duke pasur parasysh të kaluarën nacionalsocialiste të Gjermanisë, do të ishte “diçka krejtësisht ndryshe” nëse ekstremistët e ekstremit të djathtë do të rifitonin pushtetin. Megjithë sondazhet, Merz mbetet i sigurt përpara zgjedhjeve të shtatorit: “Fushatat sapo kanë filluar. Mbetem i bindur se do të arrijmë ta parandalojmë AfD-në të sigurojë shumicën parlamentare në cilindo prej tre shteteve – veçanërisht në Saksoni-Anhalt dhe Mecklenburg-Vorpommern.”
Përveç këtyre dy provincave lindore, zgjedhjet do të mbahen edhe në kryeqytetin gjerman, Berlin, i cili është njëkohësisht qytet dhe provincë federale.
Në lidhje me propozimin e tij për t’i ofruar Ukrainës perspektivën e anëtarësimit në Bashkimin Evropian pa të drejtë vote si hap të parë, Merz shpjegoi se ukrainasve duhet t’u thuhet sinqerisht se rruga drejt BE-së është më e vështirë nga sa mendohej fillimisht, por ai është në favor të ndërmarrjes së hapave të vegjël por të qëndrueshëm tani.
“Tani për tani, në thelb kemi pesë vendet e Ballkanit Perëndimor, Moldavinë dhe Ukrainën si anëtarë të rinj potencialë të Bashkimit Evropian – këto janë vendet që presin që BE të ndërmarrë hapat e ardhshëm,” tha ai.
Bashkimi nuk ka pranuar asnjë anëtar të ri për 13 vjet, pavarësisht premtimeve të shumta. Nëse BE dëshiron të ruajë besueshmërinë e saj, sipas kancelarit, atëherë hapa të vegjël por të sinqertë janë në radhë. “Nëse e humbasim atë besueshmëri, i humbasim ato vende.”