Misteri në New York: Persona të paidentifikuar zbresin në një pusetë
Një ngjarje e pazakontë ka ndodhur në Long Island, Nju Jork, ku pesë persona janë filmuar duke hapur një pusetë dhe duke u futur në sistemin nëntokësor të kanalizimeve. Incidenti ka ndodhur rreth orës 01:00 të mëngjesit në zonën Wantagh, në kryqëzimin e Wantagh Avenue me Jerusalem Avenue.
Pamjet nga kamerat e sigurisë tregojnë pesë personat duke punuar së bashku për të hapur kapakun e pusettës. Më pas, ata zbresin njëri pas tjetrit në rrjetin nëntokësor dhe, pasi të gjithë kanë hyrë, mbyllin përsëri kapakun. Dy dëshmitarë të ngjarjes kanë njoftuar Policinë e Qarkut Nassau.
Oficerët kanë mbërritur në vendngjarje dhe kanë kontrolluar rrjetin nëntokësor, por nuk kanë mundur të gjejnë asnjë nga personat e përfshirë. Ky rast vjen vetëm pak ditë pas publikimit të një videoje tjetër, ku tre burra u filmuan duke dalë nga një pusetë pranë Stacionit Penn në Manhattan.
Në pamjet e publikuara në gusht, tre burra, të veshur me rroba pune dhe me fenerë në kokë, shiheshin duke dalë nga një pusetë në kryqëzimin e Rrugës së 32-të me Seventh Avenue, pranë Stacionit Penn dhe Madison Square Garden. Departamenti i Policisë së Nju Jorkut po heton këtë incident, ndërsa deri më tani nuk ka pasur arrestime.
Incidente të ngjashme janë raportuar edhe gjatë kësaj vere në Brooklyn dhe Queens. Autoritetet po shqyrtojnë mundësinë që disa prej personave të kenë hyrë në rrjetin e kanalizimeve në kërkim të sendeve me vlerë që mund të kenë përfunduar aty. Megjithatë, deri më tani nuk ka konfirmim se incidentet e ndryshme janë të lidhura me njëra-tjetrën.
Këto raste misterioze kanë tërhequr vëmendje të madhe në rrjetet sociale, ku personat e filmuar janë pagëzuar jozyrtarisht si “njerëzit e urithëve” të Nju Jorkut.