Si u shpëtoi sulmeve që vranë të atin, Mojtaba Khamenei? Zyrtari iranian: Ndodhej në të njëjtën ndërtesë, por…
Javë pas emërimit të tij, udhëheqësi i ri suprem i Iranit, Mojtaba Khamenei, mbetet një figurë misterioze, pasi nuk është parë ose dëgjuar në publik që atëherë. Raportet e fundit sugjerojnë se ai është plagosur rëndë dhe ka vështirësi në komunikim.
Zëvendësi për çështjet ndërkombëtare në zyrën e udhëheqësit suprem ka bërë të reja pretendime në lidhje me Khamenein për Agjencinë e Lajmeve Fars të Iranit. Mohsen Qomi shpjegoi se si Mojtaba Khamenei i mbijetoi sulmit që vrau babanë dhe paraardhësin e tij, Ali Khamenei, në fillim të luftës, sipas mediave ndërkombëtare, duke cituar Fars.
Kleriku i lartë tha: “Ai ndodhej në ndërtesë në atë kohë, në të njëjtën ndërtesë që u bombardua dhe ku ata që ishin brenda u vranë. Disa minuta më parë, rastësisht ose me vullnet hyjnor, ai kishte shkuar në oborr dhe Zoti kishte vendosur që ai të shpëtonte.”
Qomi këmbënguli gjithashtu se Khamenei është “plotësisht i shëndetshëm” dhe po kryen detyrat e tij. Një javë tjetër ka kaluar pa u shfaqur udhëheqësi suprem, por Khamenei ka lëshuar një deklaratë të re, e cila u lexua në televizionin shtetëror.